ایڈیشنل آئی جی کراچی غلام نبی میمن کا کہنا ہے کہ   کرائم سے ڈرنا نہیں چاہیے بلکہ اس کا مقابلہ کرنا چاہیے۔

کورنگی ایسوسی ایشن آف ٹریڈ اینڈ انڈسٹری(کاٹی) میں تقریب سے خطاب کرتے ہوئے  ایڈیشنل آئی جی کراچی غلام نبی میمن کا  کہنا تھا کہ کرائم کی کمی کے لیے پولیس ،میڈیا اور لوگوں کو مل کر کام کرنا ہوگا۔

ایڈیشنل آئی جی کراچی نے کہا کہ    کرائم پوری دنیا میں ہے، تعاون اور اتحاد سے کرائم کم کیا جاسکتا ہے۔ کرائم فگر اس لیے زیادہ ہے کہ ہر واقعہ کا مقدمہ درج ہونے لگا ہے۔

غلام نبی میمن نے کہا کہ  کرائم رجسٹریشن نہ کرنا کرمنل کو لائسنس دینا  ہے کہ وہ مزید کرائم کرتا رہے۔ کرائم کی رجسٹریشن بڑھائی گئی ہے جس سے کرائم ہائی لائٹ ہوتا ہے،اس سے افسران پر بھی پریشر آتا ہے کہ کیس حل کرنا ہے۔

انہوں نے کہا کہ  متاثرہ شخص مقدمہ نہیں کرتا تو سرکار کی مدعیت میں مقدمہ کرتے ہیں، اس سے عدالتوں میں جرائم پیشہ افراد کے خلاف ثبوت بن رہے ہیں۔بڑے کرائم کے واقعات میں کافی حد تک کمی آچکی ہے۔

ایڈیشنل آئی جی کراچی نے کہا کہ اس شہر میں بیروزگاری ہے، جرائم پیشہ افراد عدالت سے جلد باہر آجاتے ہیں۔  شہریوں کو ڈر ہے کہ کہیں پرانا دور واپس نہ آجائے۔ ہم اس مائنڈ سیٹ کے ساتھ کام کر رہے ہیں کہ جرائم پیشہ شخص جلد جیل سے نہ آئے۔

غلام نبی میمن نے کہا کہ   ہم  افسران کو کیٹگری میں تقسیم کرنا چاہتے ہیں۔ جو قتل کے کیس حل کرتا ہے وہ قتل کے کیس ہی دیکھے، جو ڈکیتی کے کیس دیکھتا ہے وہ ڈکیتی کے کیس ہی دیکھے۔ اس عمل سے پولیس میں مختلف کیس کی مہارت آئے گی۔

انہوں نے مزید کہا کہ 70 سال کے بعد تھانوں کو پہلی بار بجٹ ملا ہے۔ مددگار 15  کا رسپانس ٹائم 8 منٹ تک آگیا ہے۔ایس ایچ او لگانے کا کام مکمل میرٹ پر آگیا ہے۔ ہم اپنی کامیابیوں کو مزید بہتر  کریں گے۔