وزیر خارجہ شاہ محمود قریشی نے کہا ہے کہ پاکستان کی جانب سے روس کے ساتھ دوطرفہ تعلقت انتہائی اہمیت کے حامل ہیں۔

تفصیلات کے مطابق ماسکو میں جاری شنگھائی تعاون تنظیم کی وزرائے خارجہ کونسل کے اجلاس کے موقع پر وزیر خارجہ مخدوم شاہ محمود قریشی کی روسی وزیر خارجہ سرگئی لاوروف سے ملاقات ہوئی ہے۔

دوران ملاقات دو طرفہ تعلقات، کورونا وبائی صورتحال ،اہم علاقائی و عالمی امور سمیت باہمی دلچسپی کے معاملات پر تبادلہ خیال کیا گیا ہے۔

دونوں وزرائے خارجہ کی جانب سے دو طرفہ تعلقات کے فروغ اور باہمی دلچسپی کے مختلف شعبوں میں دو طرفہ تعاون بڑھانے کیلئے مشاورت جاری رکھنے پر اتفاق بھی کیا گیا ہے۔

وزیر خارجہ نے کہا ہے کہ پاکستان روس کے ساتھ دو طرفہ تعلقات کو مزید مضبوط اور مستحکم بنانے کیلئے کثیرالجہتی شعبہ جات میں دو طرفہ تعاون کے فروغ کا متمنی ہے۔

دونوں وزرائے خارجہ نے افغانستان میں قیام امن کے حوالے سے کی جانے والی کاوشوں کا جائزہ لیا اور اس سلسلے میں اب تک ہونیوالی پیش رفت پر اطمینان کا اظہار کرتے ہوئے کہا ہے کہ پاکستان شروع سے افغانستان میں بدامنی کے خاتمے اور دیرپا امن کے حصول کیلئے افغان قیادت میں، افغانیوں کو قبول مفاہمتی عمل پر مبنی مذاکرات کا حامی رہا ہے۔

وزیر خارجہ نے اپنے روسی ہم منصب کو مقبوضہ جموں و کشمیر میں جاری بھارتی مظالم اور انسانی حقوق کی سنگین خلاف ورزیوں سے آگاہ کرتے ہوئے بتایا ہے کہ بھارت نے بین الاقوامی قوانین اور اقوام متحدہ کی قراردادوں کو پس پشت ڈالتے ہوئے مقبوضہ کشمیر میں آبادیاتی تناسب کو بدلنے کی مذموم کوشش کی ہے۔