وزیراعلیٰ خیبرپختونخوا محمود خان نے کہا ہے کہ سیاحت کی تیزرفتار اور دیرپا ترقی موجودہ حکومت کے اہم اہداف میں شامل ہے۔

تفصیلات کے مطابق وزیراعلیٰ خیبر پختونخوا محمود خان کی زیر صدارت محکمہ سیاحت کا اجلاس ہوا جس میں میں وزیراعظم کی ہدایات اور نیشنل کوآرڈنیشن کمیٹی برائے سیاحت کے فیصلوں کی روشنی میں اقدامات پر بریفنگ دی گئی۔

اجلاس میں بریفنگ کے دوران کہا گیا کہ سیاحتی مقامات تک رسائی کیلئے سڑکوں کی تعمیر پر کام تیز کرنے اور وزیراعلیٰ کی سیاحت کے فروغ و ترقی کیلئے دیگر تمام منصوبوں پر کام تیز کرنے جبکہ سیاحتی مقامات پر مقامی ، قومی اور بین الاقوامی سیاحوں کی ضرورت کے مطابق معیاری تربیت کے حامل ٹوارزم آپریٹرز کی فراہمی کرنے کی بھی ہدایت کی گئی۔

بریفنگ میں کہا گیا کہ ہزارہ اور ملاکنڈ ڈویژن کے سیاحتی مقامات تک رسائی سڑکوں کی تعمیر کے منصوبوں کیلئے ورک آرڈر جاری کئے جاچکے ہیں جبکہ ہاسپیٹلٹی انڈسٹری اور ٹوور آپریٹرز کی استعداد کار میں اضافہ کیلئے سٹاف کی ہائیرنگ ، آلات کی خریداری اور تربیت کا عمل رواں مالی سال میں مکمل کرلیا جائیگا۔

بریفنگ میں یہ بھی کہا گیا کہ یوتھ ڈویلپمنٹ پیکج کے تحت خیبرپختونخواامپیکٹ چیلنج پروگرام مکمل کر لیا گیا ہے اور نیشنل یوتھ کارنیول پر کام جاری ہے جبکہ صوبے میں پانچ جوان مراکز قائم کئے جا چکے ہیں جبکہ پندرہ جوان مراکز کیلئے زمین کی نشاندہی کی جا رہی ہے۔

 بریفنگ کے دوران کہا گیا کہ مردان میں خواتین کیلئے جمنازیم اور کثیر المقاصد ہال کی تعمیر پر 70 فیصد کام مکمل کیا جا چکا ہے جبکہ کوہاٹ، ڈی آئی خان، بنوں ، سوات ، ایبٹ آباداور پشاور میں جمنازیم اورکثیر المقاصد ہال کی تعمیر پر سول ورک جلد شروع کر دیا جائے گا۔

بریفنگ کے دوران یہ بھی کہا گیا کہ ریسٹ ہاﺅسز کی آﺅٹ سورسنگ اور آن لائن بکنگ کے لیے  48 ریسٹ ہاﺅسز کے آرایف پی شائع کئے جا چکے ہیں اور 94 ریسٹ ہاﺅسز کے آر ایف پی تیار ہیں جو رواں ہفتے پبلش کئے جائیں گے۔

اجلاس میں کہا گیا کہ مربوط ٹوارزم مینجمنٹ پلان 2021 پر کام شروع ہے ، ٹوارزم ایکٹیوٹیز کلینڈر تیار کرلیا گیا ہے جبکہ سیاحتی مقامات پر تجاوزات کے خاتمے کی مہم کے تحت ہزارہ اور ملاکنڈ ڈویژن میں اقدامات کئے گئے۔

بریفنگ میں کہا گیا کہ کالام میں 67.57 کنال رقبہ واگزار کیا گیا ہے جبکہ صوبے میں تیز رفتار ترقی کیلئے 11 سیاحتی مقامات کی نشاندہی کی گئی ہے اورسیاحوں کے لیے ہر10سے 15کلومیٹر کے فاصلے پرٹائلٹ کی فراہمی یقینی بنائی جائے گی۔

بریفنگ میں یہ بھی کہا گیا کہ بدھا کوریڈور کی ترقی کیلئے گندھارا ٹریل کی پہلے سے نشاندہی کی جا چکی ہے اور گندھارا فیسٹیول 2021 ءکی منصوبہ بندی شروع ہے جبکہ صوبے میں سیاحتی استعداد کے حامل متعدد نئے مقامات کی نشاندہی کی گئی ہے جن میں ضم شدہ اضلاع کی پانچ سائٹس بھی شامل ہیں۔

اجلاس کی صدارت کرتے ہوئے محمود خان نے کہا کہ صوبے کے اہم سیاحتی مقامات کو بین الاقوامی معیار کے مطابق ترقی دینے کیلئے متعلقہ محکمے اپنی ذمہ داریاں بروقت پوری کریں۔

وزیراعلیٰ خیبرپختونخوا محمود خان نے مزید کہا کہ ارباب نیاز کرکٹ سٹیڈیم پشاور کی تعمیر و بہتری کا میگا منصوبہ ہے، ارباب نیازاسٹیدیم پرکام ہر حال میں مقررہ ٹائم لائن کے مطابق مکمل کرنا ہے جبکہ سیاحت کی تیز رفتار اور دیرپا ترقی موجودہ حکومت کے اہم اہداف میں شامل ہے۔