بارشوں کے باعث شہر بھر میں تباہی کے نتیجے میں پانی کی لائنیں بھی متاثر ہوئی ہیں جس کا مرمتی کام شروع کردیا گیا ہے۔

اس ضمن میں ایم ڈی واٹر بورڈ کا کہنا ہے کہ شہر میں بارشوں کے پانی سے دھنسنے والی لائنوں کی تبدیلی کا کام جاری ہے جو کہ ریکارڈ مدت میں مکمل کرلیا جائیگا۔

ایم ڈی کا کہنا ہے کہ ہوٹل میرٹ کے قریب واٹر بورڈ کی 66 انچ قطر کی دھنسنے والی سیوریج لائن ہنگامی بنیادوں پرتبدیل کردی گئی اور نکاسی آب کا عمل بھی شروع کردیا گیا ہے۔

انہوں نے مزید بتایا کہ گلبرگ میں شاہراہ پاکستان کے قریب دھنسنے والی 24 انچ قطر کی سیوریج لائن کی تبدیلی کا کام مکمل کرلیا گیا ہے، لسبیلہ میں بھی دھنسنے والی 48 انچ قطر کی سیوریج لائن تبدیل کردی گئی۔

خالد شیخ نے بتایا ہے کہ پولو گراؤنڈ نزد رینجرز ہیڈ آفس کے قریب 72 انچ قطر کی سیوریج لائن کی تبدیلی اور لیاقت آباد ڈاکخانہ کے قریب دھنسنے والی 36 انچ قطر کی سیوریج لائن کی تبدیلی کا عمل بھی آج رات تک مکمل کرلیا جائے گا۔

ان کا کہنا ہے کہ جمشید ٹاؤن، ٹیپو سلطان روڈ پر دھنسنے والی 24انچ قطر کی لائن کی تبدیلی کے ابتدائی کام کا آغاز کردیا گیا ہے جبکہ اللہ والا ٹاون کورنگی کراسنگ میں برساتی پانی کی نکاسی بھی شروع کردی گئی ہے۔

ان کے مطابق کنیز فاطمہ سوسائٹی میں دھنسنے والی 48 انچ قطر کی لائن کی تبدیلی کیلئے کام کا آغازآج رات شروع ہوجائے گا۔