پاکستان مسلم لیگ (ن) کے صدر اور قائد حزب اختلاف شہباز شریف نے کہا ہے کہ بجلی کی قیمتوں میں اضافہ ظلم ہے، عوام اس فیصلے کو مسترد کرتے ہیں۔

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہباز شریف کی جانب سے بجلی کی قیمتوں میں اضافے پر شدید ردعمل ظاہر کیا گیا ہے۔

اپوزیشن کا کہنا تھا کہ حکومت پہلے ہی ریکارڈ مقدار میں بجلی، گیس کی قیمتوں میں اضافہ کر چکی ہے لیکن اب کے الیکٹرک کی مذمت کرنے والے وزیراعظم اور ان کے وزراء کس منہ سے خود مہنگی بجلی کا بم عوام پر گرا رہے ہیں۔

انہوں نے مطالبہ کیا ہے کہ حکومت بجلی کی قیمتوں میں اضافہ واپس لے ورنہ شدید احتجاج کیا جائے گا، عوام کے ساتھ ظلم و زیادتی برداشت نہیں کرینگے۔

شہباز شریف نے کہا ہے کہ وزیراعظم آٹا، گندم، چینی، دوائی، پٹرول چوری سے حواریوں کی جیب بھررہا ہے جبکہ غریب عوام پر ہر روز مزید بوجھ لادا جا رہا ہے۔

انہوں نے تنقید کرتے ہوئے کہا ہے کہ پٹرول کی قیمت نہ بڑھا کر ہیرو بننے کی کوشش کرنے والے بجلی کی قیمت بڑھا کر زیرو بن گئے ہیں۔

اپوزیشن لیڈر کا مزید کہنا تھا کہ حکومت نے ایل این جی کی درآمد میں مجرمانہ تاخیر کی جس سے گیس کے بجائے تیل سے مہنگی بجلی پیدا ہوئی، اس کا ذمہ دار کون ہے؟

انہوں نے کہا کہ معیشت، کاروبار، روزگار ٹھپ ہے اور حکومت ٹیکس پر ٹیکس لگا کر عوام سے جینے کا حق چھین چکی ہے۔