وزیراعظم عمران خان کے نمائندہ خصوصی مولانا طاہر محمود اشرفی نے کہا ہے کہ اسلام امن پسند دین ہے اور یورپین ممالک میں اسلام فوبیہ کا دور دورہ ہے۔

تفصیلات کے مطابق وزیراعظم عمران خان کے نمائندہ خصوصی مولانا طاہر محمود اشرفی نے پریس کانفرنس سے خطاب کرتے ہوئے کہا ہے کہ اس وقت امت مسلمہ اضطراب میں ہے کیونکہ  یورپین ممالک میں مسلمانوں کی روحانی کتاب کو جلایا جارہا ہے۔

مولانا طاہر کا کہنا تھا کہ اسلام کا پیغام امن کا پیغام ہے اور اسلام کسی قسم کی انتہاء پسندی اور دہشت گردی کو قبول نہیں کرتا ہے۔

انہوں نے کہا ہے کہ ہمارا پیغام یہ ہے کہ دنیا میں سب اپنے اپنے دین اور مسالک کے دائرہ کار میں رہ کر زندگی گزاریں۔

ان کا مزید کہنا تھا کہ دین اسلام تو کسی جھوٹے مذہب کے خدا کو گالی دینے سے بھی منع کرتا ہے تاہم اس کے بعد بھی یہ جاننے کی ضرورت ہے کہ دنیا اسلامی فوبیا کا شکار کیوں ہوگئی ہے۔

معاون خصوصی نے بتایا ہے کہ وزیر اعظم نے تمام اسلامی ممالک کے سربراہان کو قرآن حکیم اور حضور نبی کریم ص کی ناموس کے تحفظ کی قانون سازی کے لیے خطوط لکھے ہیں کیونکہ اگر توہین آمیزی کا یہ سلسلہ نہ رکا تو پوری دنیا کا امن خطرے میں پڑ جائے گا۔

انہوں نے کہا کہ وزیر اعظم کی ہدایت پر کل سے پورا ہفتہ عشق رسول ص کے ہفتے کے طور پر منایا جائے گا جس میں ہم پوری دنیا کو دعوت دیتے ہیں کہ آو امن کی طرف بڑھیں۔

ان کا کہنا تھا کہہمیں جو بھی احتجاج اور مظاہرے کرنے ہیں وہ پر امن رہتے ہوئے کرنے ہیں۔