چیئرمین سینیٹ محمد صادق سنجرانی کا کہنا ہے کہ  پاکستان روس کے ساتھ اپنے کثیر الجہتی مراسم کو قدر کی نگاہ سے دیکھتا ہے۔

تفصیلات کے مطابق  پاکستان میں روس کے سفیر  نے چیئرمین سینیٹ محمد صادق سنجرانی سے ملاقات کی جس دوران دو طرفہ اہم امور پر تبادلہ خیال کیا گیا ۔

اس موقع پر چیئر مین سینیٹ صادق سنجرانی نے کہ  دونوں ملکوں کے درمیان اسٹریٹجک پارٹنرشپ سے علاقائی امن اور ترقی میں مدد ملے گی۔

صادق سنجرانی نے کہا کہ  خطے کی تیزی سے بدلتی صورتحال مستحکم رابطہ کاری کی متقاضی ہے۔  دونوں ملکوں کے درمیان سیاسی، سفارتی و اقتصادی تعاون میں بہتری دیکھنے میں آئی ہے۔

انہوں نے مزیدکہا کہ بین الاقوامی سطح پر تعاون ایک دوسرے پر اعتماد کی عکاسی کرتا ہے۔  پاکستان اور روس کے تعلقات خطے کی ترقی اور خوشحالی کے لیے بھی مفید ثابت ہو رہے ہیں۔

چیئرمین سینیٹ نے کہا کہ  تجارت اور عوامی سطح پر روابط کے علاوہ دوسرے شعبوں میں تعاون  کے لیے وسیع مواقع موجود ہیں۔ تجارتی حجم کو بڑھانے کے لیے دونوں ملک سنجیدگی کے ساتھ رابطوں میں ہیں۔

صادق سنجرانی نے کہا کہ  باہمی تعاون کے ذریعے تجارتی سطح پر رابطوں کو بڑھانے  کے لیے وسیع مواقع موجود ہیں۔ روس اور پاکستان خطے کی ترقی اور خوشحالی کے لیے موثر کردار ادا کرنے کی صلاحیت رکھتے ہیں۔

انہوں نے مزید کہا کہ  پاکستان ایک پرُ امن ملک ہے اور امن اور ترقی کی اہمیت کو سمجھتا ہے۔  پارلیمانی رابطہ کاری کے ذریعے دوطرفہ تعاون اور عوامی سطح پر روابط کو مزید فروغ دینے میں مدد ملے گی۔

روسی سفیر نے کہا کہ   پاکستان ،روس کے لیے انتہائی اہم ملک ہے اور پاکستان کے ساتھ دوطرفہ تعاون کو سماجی اور اقتصادی سطح پر مزید بڑھانے کے خواہاں ہیں۔