پاکستان مسلم لیگ ن کے صوبائی صدر رانا ثناء اللہ نے کہا ہے کہ وفاقی اور پنجاب کی کٹھ پتلی حکومتیں جلسہ کی اجازت دینا نہیں چاہتیں ہیں۔

تفصیلات کے مطابق مسلم لیگ ن کے صوبائی صدر رانا ثناء اللہ نے میڈیا کے ساتھ گفتگو کرتے ہوئے بتایا کہ 16 اکتوبر کو پی ڈی ایم کے جلسہ کی اجازت نہیں بھی دی گئی تو جلسہ ہر صورت ہو گا کیونکہ ڈپٹی کمشنر وعدہ کر نے کے باوجود ملاقات کیلئے تشریف نہیں لا ئے ہیں۔

انہوں نے بتایا ہے کہ سوموار تک جناح اسٹیڈیم میں جلسہ کی اجازت نہ دی گئی تو جی ٹی روڈ پر جلسہ ہو گا اور جی ٹی روڈ پر جلسہ کی صورت میں سکیورٹی خدشات پیدا ہوں گے تاہم سکیورٹی کی وجہ سے کسی قسم کا ناخوشگوار واقعہ رونما ہوا تو اسکی براہ راست ذمہ داری عمران نیازی پر ہو گی۔

ان کا کہنا تھا کہ جلسہ میں رکاوٹیں ڈالنے کیلئے پی ٹی آئی کی حکومت اوچھے ہتھکنڈے استعمال کر رہی ہے لیکن جلسہ کی راہ میں رکاوٹیں اور گرفتاریاں جلسہ کی کامیابی کی ضمانت ہوں گی۔

رانا ثناء اللہ نے کہا ہے کہ جلسہ روکنے کیلئے حکومت کے کورونا سے مذاکرات بھی ناکام ہو گئے ہیں اسی لئے پی ٹی آئی کی جانب سے 16 اکتوبر کو ریلی کا اعلان تصادم کی خواہش ہے۔

انہوں نے کہا ہے کہ حکومت کی جانب سے جلسہ کو روکنے کی کوشش کی گئی تو پورا گوجرانوالہ جلسے کا پنڈال ہو گا۔