کورونا ایس او پیز سے متعلق محکمہ داخلہ سندھ کی جانب سے نئی گائیڈ لائنز جاری کردیں گئیں ہیں۔

تفصیلات کے مطابق این سی او سی کی کورونا سے متعلق نئی ہدایات کے معاملے پر محکمہ داخلہ سندھ نے اپنی نئی گائیڈ لائنز جاری کردی ہیں۔

محکمہ داخلہ سندھ کی جاری کردہ نئی گائیڈلائنز کے مطابق اب 500 سیٹنگ والے شادی ہالز میں 250 افراد کو اجازت ہوگی تاہم شادی ہالز سمیت دیگر انڈور پروگرامز میں تین فٹ کے سماجی فاصلے کو یقینی بنایا جائے۔

گائیڈلائنز میں بتایا گیا ہے کہ مذہبی، کھیلوں سمیت دیگر مقامات پر بھی کورونا سے متعلق احتیاطی تدابیر اپنائی جائے جبکہ انڈور تقریبات کے لیے زیادہ سے زیادہ وقت 3 گھنٹے ہوگا۔

محمکہ داخلہ سندھ نے کھلی فضا میں ہونے والے ایونٹس کے لیے داخلی اور خارجی راستے لازمی قرار دیا ہے اور اس کے ساتھ ہی کورونا کیسز بڑھنے کے باعث سختی سے ایس او پیز پر عمل کیا جائے۔

نئی گائیڈلائنز میں ریلیوں، اجتماعات سمیت دیگر سرگرمیاں کرانے والے آرگنائزر کورونا ایس او پی پر عمل درآمد کرانے کے پابند ہونے سمیت سینیٹائزر، ماسک اور سماجی فاصلہ لازمی برقرار رکھے جانے کے سخت اھکامات جاری کئے گئے ہیں جبکہ خلاف ورزی والے آرگنائزر کے خلاف کارروائی کی جائیگی۔

محکمہ داخلہ کے مطابق کورونا ضابطہ اخلاق کی خلاف ورزی کرنے والے آرگنائزرز پر اجتماعات کرانے پر 4 سے 6 ماہ تک کی پابندی ہوگی اور اس سے متعلق محکمہ داخلہ نے کورونا کے پھیلائو کو روکنے کے لیے ضلعی اور ڈویژن سطح کی انتظامیہ کو سخت احکامات جاری کردیے ہیں۔

یاد رہے کہ اس سے قبل گزشتہ روز این سی او سی کی جانب سے جاری کردہ نئے فیصلوں میں لاہور، کراچی سمیت ملک کے بڑے شہروں میں عوامی مقامات پر ماسک پہننا لازمی قراردیدیا گیا تھا۔

این سی او سی کی جانب سے پبلک ٹرانسپورٹ، مارکیٹوں، ریلوے اسٹیشن، ریل گاڑی کے اندر، اور دیگر رش والی جگہوں پر ماسک کی پابندی کروانے کا فیصلہ کرتے ہوئے کورونا پھیلانے والے علاقوں میں اسمارٹ لاک ڈاؤن کرنے کا بھی فیصلہ کیا گیا ہے۔

نئے فیصلوں کے زیر اثر ہرطرح کی تجارتی سرگرمیاں، مارکیٹیں بازار رات دس بجے بند کردئیے جائیں گے جبنکہ میرج ہالز، شاپنگ مالز بھی رات دس بجے بند کئے جائیں گے اور تمام تفریحی پارکس روزانہ شام بجے بند کردئیے جائیں گے۔