سندھ پولیس کی اعلیٰ قیادت کی جانب سے 60 روز کی چھٹیوں پر جانے کا فیصلہ کرلیا گیا ہے۔

تفصیلات کے مطابق سندھ پولیس کی اعلیٰ قیادت کی جانب سے قانونی کارروائیوں میں سیاسی دباؤ کو کسی بھی طور پر برداشت نہ کئے جانے کا مؤقف اختیار کرتے ہوئے چھٹیوں پر جانے کا فیصلہ کیا گیا ہے۔

سندھ پولیس کی اعلیٰ قیادت آئی جی مشتاق مہر اور ایڈیشنل آئی جی غلام نبی میمن کی جانب سے چھٹیوں کی درخواست  سندھ حکومت کو ارسال کی جارہی ہیں جبکہ اس سے متعلق کوئی بھی اپنا  مؤقف پیش نہیں کررہا ہے۔

سیاسی مداخلت کے باعث پولیس افسران کی جانب سے چھٹیوں پر جانے کے لئے درخواستیں تیاری کرلیں گئیں ہیں جبکہ آئی جی سندھ مشتاق مہر نے بھی چھٹیوں کی درخواست ایس این جی ڈی کو بھیج دی ہے۔

اس ضمن میں سندھ پولیس کے ترجمان موقف دینے سے گریز کرنے لگے ہیں ۔

سندھ پولیس کی اعلیٰ قیادت میں آئی جی سندھ، ایڈیشنل آئی جی کراچی، ایڈیشنل آئی جی اسپیشل برانچ اور متعدد ڈی آئی جیز شامل ہیں۔

ایڈیشنل آئی جی اسپیشل برانچ عمران یعقوب منہاس نے اپنی چھٹیوں کی درخواست میں موقف اختیار کیا ہے کہ کیپٹن(ر) صفدرکے خلاف ایف آئی آر کے واقعے میں پولیس افسران کو بے عزت کیا گیا اور ایف آئی آر کے معاملے میں افسران سے ناروا رویئے پر تمام پولیس افسران کو دھچکا لگا۔

عمران یعقوب نے لکھا ہے کہ دباؤ کے اس ماحول میں پیشہ وارانہ فرائض کی انجام دہی مشکل ہے، اس دباؤ سےنکلنے کیلیےمجھے 60 روز کی رخصت درکار ہے۔