گورنر سندھ عمران اسماعیل نے واضح کیا ہے کہ  بنڈل آئی لینڈ سندھ کا حصہ ہے اور رہے گا، وفاق کی جانب سے اس پر کوئی قبضہ نہیں کیا جارہا ہے۔

تفصیلات کے مطابق وفاقی وزیر برائے بحری امور علی زیدی کے ہمراہ گورنر سندھ عمران اسماعیل نے پریس کانفرنس کرتے ہوئے بنڈل آئی لینڈ کے حوالے سے بتایا ہے۔

گورنر سندھ کا کہنا ہے کہ آئی لینڈ منصوبہ سے 50 بلین ڈالر آئیں گے اور اس ضمن میں وزیراعظم کی ہدایت پر وزیراعلیٰ سندھ سے ملاقات کرینگے کیونکہ اتنا بڑا منصوبہ وفاق اکیلا نہیں بنا سکتا ہے اس لئے خواہش ہے سندھ حکومت ساتھ دے۔

عمران اسماعیل نے کہا ہے کہ وزیراعظم کا وژن ہے کہ دو نئے شہر آباد کیے جائیں کیونکہ آئی لینڈ منصوبہ سے ڈیڑھ لاکھ نوکریوں کا اضافہ ہوگا جبکہ آئی لینڈ ڈویلپ ہونے سے سندھ میں سیاحتی ترقی ہوگی۔

انہوں نے بتایا کہ آئی لینڈ سے ریونیو سندھ حکومت کو ملے گا اور اس ضمن میں سرمایہ کاری پاکستان آرہی ہے، تمام دنیا سے لوگ وزیراعظم ہاوس میں رابطہ کر رہے ہیں۔

ان کا مزید کہنا تھا کہ ہم روزانہ بڑی مقدار میں گندا پانی اور سولڈ ویسٹ سمندر میں پھینک رہے ہیں جس کے باعث سمندر کے پانی کا رنگ تک تبدیل ہوگیا ہے جبکہ اس منصوبے کے تحت بنڈل آئی لینڈ کے پانی کو صاف کیا جائے گا۔

گورنر سندھ نے کہا ہے کہ ہم بھی سندھ کے بیٹے ہیں اس لئے یہ تاثر غلط ہے کہ سندھ پر کوئی قبضہ کرنے جارہا ہے جبکہ سیاسی اختلاف ایک طرف، ہم پاکستان کی ترقی کے لیے سندھ حکومت کے ساتھ بیٹھنے کے لیے تیار ہیں۔