سندھ حکومت نے یونیورسٹیز میں  گلگت اور آزاد کشمیر کی سیٹیں بڑھانے کا فیصلہ کرلیا۔

تفصیلات کے مطابق  وزیراعلیٰ سندھ سید مراد علی شاہ کی زیر صدارت یونیورسٹیز اینڈ بورڈ کا اجلاس ہوا۔

اجلاس میں مشیر قانون مرتضیٰ وہاب، پرنسپل سیکریٹری ساجد جمال ابڑو اور سیکریٹری یونیورسٹی اینڈ بورڈ علم الدین بلو شریک ہوئے ۔

اجلاس میں  وزیر اعلیٰ کو آگاہی فراہم کی گئی کہ سندھ میں پبلک سیکٹر میں کل 25 یونیورسٹیزہیں، ان 25 یونیورسٹیزمیں آزاد کشمیر اور گلگت بلتستان کی 162 سیٹیں مختص ہیں۔

اجلاس میں سندھ کی 9  یونیورسٹیز میں گلگت بلتستان اور آزاد کشمیر کی 58 سیٹیں بڑھانے کا فیصلہ کیا گیا۔ باقی 16 پبلک سیکٹر یونیورسٹیزمیں سیٹیں بڑھانے  کے لیے پی ایم ڈی سی اور ایچ ای سی سے اجازت لی جائے گی۔

جن یونیورسٹیوں میں آزاد کشمیر اور گلگت بلتستان کی سیٹیں بڑھائی گئی ہیں وہ مندرجہ ذیل ہیں۔

سندھ یونیورسٹی میں آزاد کشمیر کی 4 اور گلگت بلتستان کی 7 مزید سیٹیں بڑھائی گئیں، این ای ڈی یونیورسٹی میں آزاد کشمیر کی  2  اور گلگت بلتستان کی 2  مزید سیٹیں بڑھائی گئی ہیں۔

ڈاؤ میڈیکل یونیورسٹی میں آزاد کشمیر کی  3  اور گلگت بلتستان کی 3 سیٹوں  کا  جبکہ  مہران یونیورسٹی میں آزاد کشمیر کی  3  اور گلگت بلتستان کی 2 مزید سیٹوں کا اضافہ کیا گیا۔

داؤد انجنیئرنگ یونیورسٹی میں آزاد کشمیر کی 3 اور گلگت بلتستان کی 3 مزید سیٹیں بڑھائی گئیں جبکہ  پیپلز یونیورسٹی میں آزاد کشمیر اور گلگت بلتستان کی ایک ایک مزید سیٹوں کا اضافہ کیا گیا ہے۔

شاہ عبداللطیف یونیورسٹی میں آزاد کشمیر اور گلگت بلتستان کی مزید 2-2 سیٹوں  کا اضافہ کیا  گیا ہے۔ زرعی یونیورسٹی ٹنڈو جام میں گلگت بلتستان کی مزید 4  سیٹیں بڑھائی گئی ہیں ۔

کراچی یونیورسٹی میں آزاد کشمیر کی 8 اور گلگت بلتستاں کی  بھی اتنی ہی سیٹوں کا اضافہ کیا گیا ہے۔

وزیراعلیٰ سندھ نے کہا کہ  حکومت کے اس فیصلے سے آزاد کشمیر اور گلگت بلتستان کے بچوں کو تعلیم کے شعبے میں فائدہ ہوگا۔