‎پاکستان مسلم لیگ (ن) کی ترجمان مریم اورنگزیب نے وزیراعظم عمران خان کو گھبرانا نہیں کا مشورہ دے دیا۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے اپنے ایک بیان میں عمران خان کو مشورہ دیتے ہوئے کہا کہ ‎عمران صاحب ابھی تو پی ڈی ایم کا دوسرا جلسہ ہے گھبرانا نہیں۔

‎پاکستان مسلم لیگ (ن) کی ترجمان نے کہا کہ عمران صاحب نے کراچی کی ریلی دیکھ کر اپنی اگلی تقریر لکھنی شروع کردی ہے جبکہ کراچی کی ریلی دیکھنے کے بعد ہماری اللہ تعالٰی سے یہی دعا ہے کہ عمران صاحب کو ظرف اور صبر دے۔

مریم اورنگزیب نے یہ بھی کہا کہ عمران صاحب عوام نے آپ کا استعفیٰ لکھ دیا ہے،‎عمران صاحب آپ اور آپ کے کرائے کے ترجمان نواز شریف کو صبح دوپہر شام رات یاد کریں ، عوام کی فکر کا بیڑا ہم نے اُٹھا لیا ہے۔

‎پاکستان مسلم لیگ (ن) کی ترجمان کا کہنا تھا کہ عمران صاحب اب پتہ چلا کہ عوام کس کے ساتھ ہیں، ‎عمران صاحب ووٹ چوری کر کے مسلط ہوں تو عوام کا ردِ عمل دیکھیں۔

مریم اورنگزیب کا یہ بھی کہنا تھا کہ ‎پی ڈی ایم کے ایک جلسے نے عمران صاحب اور کرائے کے ترجمانوں کو پاگل کردیا ہے،‎عمران صاحب اور کرائے کے ترجمانوں کی چیخیں بتا رہی ہیں کہ نواز شریف کا بیانیہ ہر گھر میں پہنچ چکا ہے۔

پاکستان مسلم لیگ (ن) کی ترجمان مریم اورنگزیب کا مزید کہنا تھا کہ‎ مہنگائی اور غربت کا توڑ ملک میں نئے شفاف اور غیر جانبدارانہ انتخابات کا انعقاد ہے جبکہ ‎عمران صاحب اور کرائے کے ترجمان روزانہ رونے کی عادت ڈال لیں کیونکہ اب ہر روز آپ کو رونا پڑے گا۔