اسپیکر قومی اسمبلی اسد قیصر کا کہنا ہے کہ  یورپی یونین کے سرمایہ کار پاکستان میں سرمایہ کاری کر کے ملک کی اقتصادی ترقی میں شامل ہو سکتے ہیں۔

تفصیلات کے مطابق  یورپی یونین کی پاکستان میں تعینات سفیر اندورولہ کامنارہ  نے اسپیکر قومی اسمبلی اسد قیصر سے پارلیمنٹ ہاؤس میں ملاقات کی۔

ملاقات میں پاکستان اور یورپی یونین کے مابین پارلیمانی اور اقتصادی تعاون بڑھانے سمیت باہمی دلچسپی کے دیگر امور پر تبادلہ کیا گیا۔

اسپیکر  قومی اسمبلی نے پاکستان کو جی ایس پی پلس کے تحت حاصل ہونے والی تجارتی رعایتوں میں یورپی یونین کے کردار  کو سراہتے ہوئے کہا کہ  یورپی یونین کے سرمایہ کار پاکستان میں سرمایہ کاری کر کے ملک کی اقتصادی ترقی میں شامل ہو سکتے ہیں۔

اسد قیصر نے کہا کہ  پُرامن افعانستان پاکستان اور خطہ کے امن اور ترقی کے لیے ناگزیر ہے۔ پاکستان افغانستان میں قیام امن کے لیے اپنا تعاون جاری رکھے گا۔

یورپی یونین  کی سفیر نے کہا کہ  یورپ میں پاکستانی مصنوعات کی مانگ ہے،پاکستان کے ساتھ تجارتی حجم کو بڑھانے کے لیے اقدامات کیے جا رہےہیں۔

سفیر یورپی یونین نے کہا کہ  پارلیمانی تعاون بڑھانے کے لیے یورپی یونین کا مشن کردار ادا کرتا رہے گا۔ یورپی یونین پاکستان کی سماجی و معاشی ترقی خصوصاً بنیادی ڈھانچے کی ترقی میں اپنا تعاون جاری رکھا جائے گا۔