صدر مملکت ڈاکٹر عارف علوی نے کہا ہے کہ پاکستان ثقافت، معیشت ، تجارت اور سرمایہ کاری کے شعبوں میں دوست ممالک کے ساتھ تعلقات کو مزید مستحکم کرنا چاہتا ہے۔

تفصیلات کے مطابق صدر مملکت ڈاکٹر عارف علوی کو چین ، افغانستان ، انڈونیشیا کے سفراء اور بنگلہ دیش اور مالدیپ کے ہائی کمشنرز نے اسناد پیش کیں، اس موقع پر صدر مملکت نے نئے مقرر کردہ سفیروں / ہائی کمشنرز سے ملاقات کی اور ان کو مبارکباد پیش کی۔

صدر نے سفراء کو کوویڈ 19 کے پھیلاؤ پر قابو پانے کے لئے پاکستان کی جانب سے اٹھائے جانے والے اقدامات کے بارے میں آگاہ کیا۔

انہوں نے کہا ہے کہ کوویڈ 19 انسانیت کو درپیش سب سے بڑا چیلنج ہے اور اس پر قابو پانے کے لئے اجتماعی کوششیں کرنا عالمی برادری کی ذمہ داری ہے۔

صدر مملکت نے  بتایا کہ ہندوستان نے پوری مقبوضہ وادی کو دنیا کی سب سے بڑی اوپن ایئر جیل میں تبدیل کردیا ہے۔

صدر نے بھارتی غیر قانونی طور پر مقبوضہ جموں وکشمیر کے عوام پر بھارتی سیکیورٹی فورسز کی طرف سے جاری انسانی حقوق کی پامالیوں پر بھی روشنی ڈالی اور کہا ہے کہ عالمی برادری ہندوستانی سیکیورٹی فورسز کی جانب سے مسلمانوں اور دیگر اقلیتی گروہوں پر ہونے والے مظالم کا نوٹس لے۔