وفاقی وزیر اطلاعات شبلی فراز نے کہا ہے کہ  حکومت نے یہ نہیں کہا تھا کہ ہم کروڑ وں نوکریاں دیں گے۔

مشیر ادارہ جاتی اصلاحات ڈاکٹر عشرت حسین کے ہمراہ پریس کانفرنس کرتے ہوئے  وفاقی وزیر اطلاعات شبلی فراز  نے کہا کہ   حکومت نے یہ نہیں کہا تھا کہ ہم اتنے کروڑ نوکریاں دیں گے۔  ہم کاروبار  کے لیے بہتر مواقع پیدا کرکے نوکریاں پیدا کریں گے۔

شبلی فراز نے کہا کہ  ہماری حکومت نے ادارہ جاتی اصلاحات  کے لیے ایک قابل ٹیم بنائی ہے۔ ہمارا مقصد اداروں کو فعال بنانا ہے تاکہ وہ بہتر پرفارم کرسکیں۔ جب لوگ میرٹ کی بنیاد پر آئیں گے  تو ادارے ایمپلائمنٹ بیورو بن جائیں گے۔

انہوں نے کہا کہ  حکومت اضافی ملازمین کا بوجھ برداشت نہیں کرسکتی ۔جو کام ہم کررہے ہیں کسی بھی حکومت  کے لیے سخت ترین فیصلے ہیں لیکن  ہم مقبولیت کی بنیاد پر فیصلے نہیں کرتے۔

وفاقی وزیر اطلاعات نے کہا کہ  اپوزیشن جماعتیں غیر ذمہ داری کا ثبوت نہ دے،  کورونا ایک مہلک مرض ہے۔ جلسے کورونا  پھیلنے کا باعث بن رہے ہیں۔

شبلی فراز نے کہا کہ  کورونا حکومت کی اختراع نہیں ایک حقیقت ہے،  اگر ہم ذمہ داری کا مظاہرہ نہیں کریں گے تو پڑوسی ملک جیسا حال ہوگا۔ اسپتالوں پر بوجھ بڑا تو براہ راست اپوزیشن رہنما ذمہ دار  ہوں گے۔

ان کا مزید کہنا تھا کہ  کابینہ میں ردوبدل کسی بھی وقت ہوسکتا ہے۔کابینہ میں ردوبدل وزیراعظم کا اختیار ہے۔وزیراعظم بہتر جانتے ہیں کس کھلاڑی کی پوزیشن کس وقت تبدیل کرنی ہے۔