چینی سفیر نے کہا ہے کہ پاکستان چین  کے لیے انتہائی اہم ملک ہے۔

تفصیلات کے مطابق   چیئرمین سینیٹ محمد صادق سنجرانی سے چین کے سفیر نونگ رونگ  نے ملاقات کی۔

چیئرمین سینیٹ نے پاکستان میں نئے تعینات ہونے والے چین کے سفیر  کے لیے نیک خواہشات کا اظہار بھی کیا۔

چیئرمین سینیٹ نے کہا کہ  پاکستان اور چین کے مابین دیرینہ تعلقات خطے کی معاشی اور سماجی ترقی  کے لیے نئے عہد میں داخل ہو گئے ہیں۔  پاکستان چین کے ساتھ اپنی فقید المثال دوستی پر فخر کرتا ہے۔

صادق سنجرانی  کا  کہنا تھا کہ  پارلیمانی وفود کے تبادلوں سے باہمی تعلقات میں مزید اضافہ ہوا ہے۔  پارلیمانی سفارتکاری اہم دوطرفہ روابط کو مضبوط بنانے میں موثر کردار ادا کرتی ہے۔

انہوں نے کہا کہ  دونوں ملکوں کے مابین ادارہ جاتی معاونت کو مزید مستحکم بنانے کی ضرورت ہے۔  سی پیک دونوں ملکوں کے مابین تعلقات کے استحکام اور علاقائی ترقی  کے لیے مشترکہ وژن کا نتیجہ ہے۔

چیئرمین سینیٹ نے کہا کہ  علاقائی خوشحالی کا خواب شرمندہ تعبیر کرنے کی بھر پور استعداد موجود ہے۔  عوامی سطح پر دوطرفہ روابط کو مزید استحکام دینے سے دیرینہ شراکت داری مزید مضبوط ہوگی۔

چینی سفیر نے چیئرمین سینیٹ کے نقطہ نظر کو  سراہتے ہوئے کہا کہ  پاکستان چین  کے لیے انتہائی اہم ملک ہے۔ دونوں ملکوں کا ترقی و خوشحالی کا وژن مشترکہ ہے۔
چینی سفیر نے کہا کہ  پارلیمانی، سیاسی اور اقتصادی تعاون کو مزید استحکام دینے کی ضرورت ہے۔