وفاقی وزیر برائے منصوبہ بندی اسد عمر نے کہا ہے کہ بلوچستان کے لیے کئے جانے والے اقدامات سے بلوچستان میں خوشحالی کا آغاز ہوگا۔

تفصیلات کے مطابق پریس کانفرنس میں وفاقی وزیر برائے منصوبہ بندی اسد عمر نے کہا ہے کہ بلوچستان کے 9 پسماندہ ترین اضلاع میں 600 ارب روپے آئیندہ کے 3 سالوں میں خرچ کیے جائیں گے ۔ یہ پاکستان کی تاریخ کا بلوچستان کے پسماندہ علاقوں کے لیے سب سے بڑا پروگرام ہے۔

اسد عمر نے بتایا ہے کہبلوچستان میں 16 نئے ڈیمز بننے جا رہے ہیں ۔ ان سے 150,000 ایکڑ اراضی زیر کاشت آئے گی جس سے روزگار کے مواقع بھی میسر ہونگے۔

انہوں نے بتایا کہ گیس کی فراہمی جدید نظام کو مدنظر رکھتے ہوے ممکن بنائی جا رہی ہے اور جو افراد زیادہ استطاعت نہیں رکھتے انکی سماجی تحفظ کے پروگرام “احساس” کے زریعے مدد کی جائے گی ۔

ان کا کہنا تھا کہبلوچستان میں بجلی کی فراہمی کے لیے کچھ گھروں کو نیشنل گرڈ کے ساتھ منسلک کیا جائے گا ۔ 273,000 گھروں کو سولر انرجی لوکل گرڈز کے ساتھ فراہم کی جائے گی۔

وفاقی وزیر کا کہنا تھا کہ بلوچستان کی ایک بڑی آبادی کے پاس بجلی کا کوئی کنکشن نہیں ہے، صرف 12 فیصد گھروں کے پاس بجلی کا نظام موجود ہے اور بلوچستان کے 9 اضلاع میں بجلی کی فراہمی کو 57فیصد تک بڑھایا جا رہا ہے۔

ان کا کہنا تھا کہ ہم علاقوں کی مجموعی ضروریات مدنظر رکھتے ہوئے ترقیاتی حکمت عملی پر عمل پیرا ہیں۔