وزیر خارجہ شاہ محمود قریشی کا کہنا ہے کہ  افغان امن عمل آخری مرحلے میں داخل ہو چکا ہے۔

تفصیلات کے مطابق وزیر خارجہ شاہ محمود قریشی   کا دورہ ء افغانستان کے ثمرات کے حوالے سے اہم بیان میں کہنا تھا کہ  افغان امن عمل  آخری مرحلے میں داخل ہو چکا ہے ، دوحہ میں بھی بات چیت چل رہی ہے۔

شاہ محمود قریشی نے کہا کہ  اس صورت حال میں وزیر اعظم عمران خان کے دورہ ء کابل کا مقصد اس پیغام کا اعادہ کرنا تھا کہ پاکستان افغان امن عمل کو منطقی انجام تک پہنچانے اور افغانستان میں مستقل اور دیرپا امن کے خواب کو شرمندہ تعبیر دیکھنے  کے لیے پرعزم ہے اور پاکستان اس ضمن میں اپنی پوری معاونت جاری رکھے گا۔

انہوں نے کہا کہ  دورہ کابل کے ذریعے پاکستان اور افغانستان کے مابین دو طرفہ تعلقات کو وسعت دینا بھی ہمارے پیش نظر تھا۔  افغانستان کے ساتھ دو طرفہ اقتصادی تعاون کے فروغ کے حوالے سے بھی افغان قیادت کے ساتھ، ہماری اہم نشستیں ہوئیں۔

وزیر خارجہ نے کہا کہ  ان نشستوں میں ہم نے ٹرانزٹ ٹریڈ، دو طرفہ تجارت اور علاقائی روابط کے فروغ کے ذریعے دو طرفہ کثیر الجہتی اقتصادی تعاون کو بڑھانے کے حوالے سے تبادلہ  خیال کیا۔

شاہ محمود قریشی نے مزید کہا کہ  صدر اشرف غنی کے ساتھ بہت اچھی نشست ہوئی، وفود کی سطح پر مذاکرات ہوئے۔

انہوں نے کہا کہ  میری، افغان وزیر خارجہ محمد حنیف آتمر اور ان کی ٹیم کے ساتھ بہت اچھی ملاقات رہی جس میں ہم نے پاکستان اور افغانستان کے مابین دو طرفہ تعلقات کے حوالے سے مستقبل کے راستے پر اتفاق کیا۔

وزیر خارجہ نے کہا کہ ہمارا افغانستان اور پاکستان کے مابین دو طرفہ تعلقات کے  مشترکہ نقطہ نظر  پر بھی اتفاق ہوا۔

شاہ محمود قریشی کا کہنا تھا کہ  میں سمجھتا ہوں کہ افغان قیادت اس دورے کی اہمیت کو سمجھتی ہے وہ وزیر اعظم عمران خان کی سوچ سے بخوبی واقف ہیں وہ وزیر اعظم کے دورہ  کابل کے منتظر تھے۔

انہوں نے کہا کہ وزیر اعظم نے انہیں دورہ  پاکستان کی دعوت بھی دی ہے جس پر انہوں نے فیصلہ کیا ہے کہ وہ مستقبل قریب میں پاکستان تشریف لائیں گے اور جہاں تک ہم نے بات پہنچائی ہے مزید اس کو آگے  لے کر چلیں گے۔