صوبائی وزیر تعلیم پنجاب ڈاکٹر مراد راس نے کہا ہے کہ ادارے کے تمام تر معاملات میرٹ اور شفافیت کی بنیادوں پر لانے پر کام کر رہے ہیں۔

تفصیلات کے مطابق اسسٹنٹ کمشنر آفس مری میں اہم اجلاس منعقد ہوا جس میں صوبائی وزیر تعلیم پنجاب ڈاکٹر مراد راس کو تحصیل مری کی تعلیمی صورتحال کے حوالے تفصیلی بریفنگ دی گئی ۔

اجلاس کے دوران ڈاکٹر مراد راس کا کہنا تھا کہ اے ای اوز و دیگر کی تجاویز اور مسائل سنے ہیں، جائز حقوق کی فراہمی کیلئے ہر ممکن اقدامات کریں گے تاہم مخض اچھی کارکردگی کا مظاہرہ کرنے والے ملازمین ہی اسکول ایجوکیشن ڈیپارٹمنٹ کا حصہ رہ سکیں گے۔

ان کا کہنا تھا کہ ضلعی انتظامیہ کو ہدایت کی ہے کہ مسائل کی نشاندہی ہوتے ہی عوام کو ان کا فوری اور موثر حل فراہم کریں کیونکہ ماضی کی حکومتوں کی جانب سے اسکول ایجوکیشن ڈیپارٹمنٹ پنجاب میں ٹیکنالوجی کا بلکل بھی استعمال نہیں کیا گیا۔

انہوں نے اسکولوں کی اپگریڈیشن کے حوالے سے بتایا کہ تحصیل مری میں 121 سرکاری اسکولوں میں ای سی ای رومز موجود ہیں اور حال ہی میں 1227 سکولوں کی ہونے والی اپگریڈیشن میں تحصیل مری کے 7 سکولوں کو اپگریڈ کیا گیا ہے۔

ان کا کہنا تھا کہ تحصیل مری میں اب تک 375 کے قریب اساتذہ و طلبا کے کرونا وائرس کے ٹیسٹ کئے گئے ہیں جس میں سے اب تک 5 طلبا و اساتذہ میں وائرس کی تشخیص ہوئی جن میں سے 4 مریض صحتیاب ہو چکے ہیں۔