وفاقی وزیر برائے منصوبہ بندی و ترقی اسد عمر نے کہا ہے کہ موجودہ دور کے چیلنجز کو مدنظر رکھ  کر نوجوانوں کو ہنرمند بنانا ہے۔

تفصیلات کے مطابق وفاقی وزیر برائے منصوبہ بندی و ترقی اسد عمر کی زیر صدارت وزیراعظم  کامیاب جوان پروگرام سے متعلق جائزہ اجلاس ہوا۔

معاون خصوصی عثمان ڈار  نے وفاقی وزیر کو کامیاب جوان پروگرام کے تحت نوجوانوں کی ترقی  کے لیے شروع کیے گئے منصوبوں کے حوالے سے بریفنگ دی ۔

معاونِ خصوصی نے نیشنل یوتھ کونسل، اسکلز فار آل ، یوتھ انٹرپرنیور شپ  اور ٹائیگر فورس کی کارکردگی سے متعلق  بھی بریفنگ دی۔

عثمان ڈار نے بتایا کہ   ملک بھر کے نوجوانوں کو کامیاب جوان پروگرام کے تحت کاروبار  کے لیے 100 ارب روپے کی خطیر رقم مختص کی گئی ہے۔

انہوں نے مزیدکہا کہ  ملک بھرسے پڑھے لکھے نوجوانوں کو چھوٹے کاروبار کے لیے قرضہ جات کی ادائیگی کامیابی سے جاری ہے ۔  50 ہزار نوجوانوں کو روزگار کے ساتھ ساتھ  تکنیکی تربیت بھی فراہم کی جا رہی ہے۔

وفاقی وزیر  نے اس موقع پر کہا کہ   موجودہ دور کے چیلنجز کو مدنظر رکھ  کر نوجوانوں کو ہنرمند بنانا ہے۔  ہنرمند اور باصلاحیت نوجوانوں کو شفاف طریقے سے میرٹ پر قرض دیں،عوام کے ٹیکس کا پیسہ سیاسی بنیادوں پر تقسیم نہ ہو ۔

اسد عمر نے مزید کہا کہ وزیر اعظم پورٹل پر تمام نوکریوں سے متعلق ایک لنک بنایا جائے تاکہ   نوجوان نسل کو ایک ہی پلیٹ فارم پر تمام معلومات میسر ہو ں۔

انہوں نے کہا کہ حکومت کی اولین ترجیح جونوان کو با اختیار اور ہنر مند بنانا ہے جس کے لیے وہ ہر ممکن کوشش کرنے میں مصروف ہیں۔