وفاقی وزیر اطلاعات شبلی فراز کا کہنا ہے کہ اپوزیشن کی سیاست کا مقصداپنی کرپشن کو  تحفظ دینا ہے۔

تفصیلات کے مطابق  وفاقی وزیر اطلاعات و نشریات شبلی فراز  کا میڈیا سے گفتگو کرتے ہوئے کہنا تھا کہ  کورونا کے معاملے پر اسپیکر قومی اسمبلی نے پارلیمانی کمیٹی تشکیل دی ہےجس میں تمام جماعتیں شامل ہیں۔

شبلی فراز نے کہا کہ  پارلیمانی کمیٹی کا مقصد اتفاق رائے سے کورونا صورتحال سے نمٹنا ہے  لیکن بد قسمتی سے آج پارلیمانی کمیٹی کے اجلاس میں اپوزیشن رہنما شریک نہیں ہوئے، اپوزیشن نے عدم شرکت سے غیر ذمہ داری کا ثبوت دیا۔

ان کا کہنا تھا کہ پاکستان نے کورونا کی پہلی لہر پر کامیابی سے قابو پایا تھا لیکن  دوسری لہر کے اعداد و شمار صورتحال کی سنگینی کو واضح کرتے ہیں۔

وفاقی وزیر اطلاعات نے کہا کہ   عوام کا تحفط اپوزیشن  کی ترجیح نہیں لیکن  عوام کے تحفظ  کے لیے حکومت تمام اقدامات کرے گی۔

شبلی فراز نے کہا کہ  پارلیمنٹ کی بالا دستی کے دعویدار اپنے اقدامات سے اس کی نفی کر رہے ہیں۔ پارلیمانی کمیٹی میں عدم شرکت سے اپوزیشن نے  پیغام دیا ہےکہ انہیں اپنی سیاست عزیز ہے، عوام نہیں۔

انہوں نے کہا کہ  قومی مسئلے کو سیاست کی نذر کرنا قابل افسوس ہے۔ اپوزیشن کی جانب سے اس اہم مسئلے پر عدم تعاون غیر ذمہ داری ہے۔ہمیں معاشی سرگرمیوں کے ساتھ کورونا کے پھیلاؤ کو بھی روکنا ہے۔

وفاقی وزیر اطلاعات نے کہا کہ تمام فیصلے اتفاق رائے سے چاہتے ہیں،حکومتی ٹیم اپوزیشن سے رابطہ کرے گی۔ کورونا سے نمٹنے  کے لیے حفاظتی اقدامات پر عملدر آمد ہم سب کی ذمہ داری ہے۔

شبلی فراز کا کہنا تھا کہ  پشاور جلسی کی ناکامی کے بعد اپوزیشن ہوش کے ناخن لیتے ہوئے دوسری سرگرمیاں منسوخ کر دے۔ اپوزیشن کی سیاست کا مقصداپنی کرپشن کو  تحفظ دینا ہے، یہ لوگ اپنے ذاتی مفادات  کے لیے عوام کی جانوں سے کھیل رہے ہیں۔

انہوں نے کہا کہ اپوزیشن کو شہریوں کی جانیں خطرے میں ڈالنے کی اجازت نہیں دیں گے۔