وزیراعلیٰ سندھ سید مراد علی شاہ نے کہا ہے کہ  صوبہ بھر میں کورونا وائرس کے پیش نظر تشخیصی شرح بڑھ رہی ہے۔

تفصیلات کے مطابق وزیراعلیٰ سندھ سید مراد علی شاہ کی زیر صدارت کورونا وائرس سے متعلق ٹاسک فورس کا اجلاس ہوا ہے جس میں ایس او پی پر سختی سے عمل کی ہدایت کی گئی ہے۔

اجلاس میں وزیراعلیٰ سندھ کا کہنا تھا کہ کورونا وائرس بڑھ رہا ہے اور اسی لئے ہمیں لوگوں کو پابند کرنا ہوگا کہ ایس او پیز پر عمل کریں۔

ان کا کہنا تھا کہ ہر جگہ ایس او پیز پر سختی سے عمل کروایا جائے اور اسکے ساتھ ساتھ تمام مذہبی مقامات پر ایس او پیز پر عمل کروانے کو یقینی بنایا جائے۔

وزیراعلیٰ سندھ کی جانب سے ہدایت کی گئی ہے کہ جہاں ایس او پیز پر عمل نہ ہو وہاں سخت کارروائی کی جائے۔

انہوں نے واضح کیا ہے کہ تمام شاپنگ مالز، تعلیمی اداروں، ریستورنٹس، فیکٹریز و دیگر عوامی مقامات پر ماسک پہننے کو یقینی بنایا جائے اور اگر ایس او پیز پر عمل نہ ہوسکا تو ہم مزید سخت اقدامات کریں گے۔

یاد رہے کہ کورونا ٹاسک فورس کا اجلاس کئی ماہ بعد ہوا ہے جس میں وزیر اطلاعات سید ناصر حسین شاہ، مشیر قانون مرتضیٰ وہاب، چیف سیکریٹری ممتاز علی شاہ، آئی جی سندھ مشتاق مہر، اے سی ایس ہوم عثمان چاچڑ، کمشنر کراچی افتخار شلوانی، وزیراعلیٰ سندھ کے پرنسپل سیکریٹری ساجد جمال ابڑو، سیکریٹری تعلیم احمد بخش ناریجو، سیکریٹری صحت کاظم جتوئی، سیکریٹری کالجز باقر نقوی، ڈاکٹر باری ، ڈاکٹر فیصل ، کور کمانڈر کے نمائندے شریک ہوئے ہیں۔