حکومت مخالف تحریک (پی ڈی ایم ) کے رہنماؤں نے حکومت سے اقتدار چھوڑنے کا مطالبہ کردیا۔

تفصیلات کے مطابق ملتان میں حکومت مخالف تحریک (پی ڈی ایم ) کے جلسے میں مسلم لیگ ن، پیپلز پارٹی ، جمیعت علمائے اسلام سمیت دیگر سیاسی جماعتوں کے رہنماؤ ں نے خطاب کیا۔

مسلم لیگ ن کی نائب صدرمریم نواز جلسے سے خطاب کرتے ہوئے کہا کہ ہماراالمیہ یہ ہےکہ ہمیں دشمن بھی ملا تو کم ظرف ملا ہے۔

مریم نواز نے پیپلزپارٹی کویوم تاسیس پرمبارک باد پیش کرتے ہوئے کہا کہ اپنی بہن آصفہ بھٹوزرداری کا سیاست میں آمد پر خیر مقدم کرتی ہوں۔

مریم نواز کا مزید کہنا تھا کہ پتہ چلا  ہےچادر اور چاردیواری کی پامالی ہورہی ہے، اسٹیڈیم کوتالے لگا دیے گئے،کارکنوں پرظلم ہورہا ہے جبکہ ہمارے نہتےکارکنوں کی گرفتاریاں ہورہی ہیں لیکن ایک جلسہ گاہ بند کیا تو ملتان کی ہرگلی جلسہ گاہ بن گئی۔

انہوں نے کہا کہ سناتھاآج جلسےکی اجازت نہیں،میں نےکہا جلسہ ہویانہ ہو،عوام کےپاس ضرورپہنچوں گی۔

سابق صدر آصف ذرداری کی صاحبزادی آصفہ بھٹو نے کہا ہے کہ عوام نے فیصلہ دے دیا ہے کہ سلیکٹڈ کوجانا ہوگا۔

آصفہ بھٹو نے کہا کہ سلیکٹڈ کے ظلم وجبر کے باوجودعوام کے جمع ہونےپرشکرگزارہوں اور پیپلزپارٹی کےیوم تاسیس پرمبارک بادپیش کرتی ہوں۔

انہوں نے کہا کہ میں ایسے وقت میں آپ کے درمیان آئی ہوں جب بلاول بھٹو زرداری کورونا وائرس میں مبتلا ہیں۔

آصفہ بھٹو نے یہ بھی کہا کہ شہید بھٹو نے فلاحی ریاست کی بنیاد رکھی جبکہ آصف زرداری نےعوامی حاکمیت کی جدوجہد جاری رکھی۔

پی ڈی ایم کےسربراہ مولانافضل الرحمان  نے ملتان میں تشددکےخلاف جمعہ  اورہفتہ کوپورےملک میں احتجاج  کا اعلان کرتے ہوئے کہا کہ ملتان کےشاہراہوں اورچوراہوں کوبندکیاگیا،  ہمارےکارکنوں کوگرفتارکیاگیا،تشددکیاگیا۔ تشدد کے خلاف  جمعہ  اورہفتہ کو پورے ملک میں احتجاج ہوگا۔