جے یو آئی (ف) کے سربراہ مولانا فضل الرحمان نے کہا ہے کہ وزیراعظم عمران خان اب خود ہم سے این آر او مانگنا چاہ رہے ہیں۔

تفصیلات کے مطابق مولانا فضل الرحمان نے میڈیا سے بات چیت کرتے ہوئے کہا ہے کہ وزیراعظم پہلے استعفیٰ دیں اور پھر وہ الیکشن کی طرف جائیں۔

مولانا فضل الرحمان نے کہا ہے کہ الیکشن کمیشن حکومت کا مواخذہ کرے کیونکہ سپریم کورٹ بھی آئین کی شق کو تبدیل نہیں کرسکتی  ہے اور نہ ہی صدارتی آرڈیننس سے آئین کو تبدیل کیا جاسکتا ہے۔

ان کا کہنا تھا کہ حکومت کی بوکھلاہٹ بتارہی ہے گھبراہٹ کا شکار ہے لیکن اب ریاستی وڈیرے حکومت کی پشت پناہی چھوڑ دیں ۔

یاد رہے کہ اس سے قبل مسلم لیگ ن کی  نائب صدر مریم نواز نے پریس کانفرنس کرتے ہوئے کہا کہ یہ حکومت نہیں ہے یہ ووٹ چوری کرکے آئی ہے ہمارے سر پر مسلط کیا گیا ہے۔

 مسلم لیگ ن کی  نائب صدر نے کہا کہ جب عوامی غصہ، عوامی قہر جاگ اٹھتا ہے تو اس قسم کے انتظامات کار گرثابت نہیں ہوتے اور اگر آپ کو پی ڈی ایم سے فرق نہیں پڑ رہا تو اچانک ایک مہینہ پہلے الیکشن کیوں اناؤنس کرنا پڑا۔

مریم نواز نے یہ بھی کہا کہ ان کو یہ سمجھ آ گئی ہے کہ حکومت کے پاس دن تھوڑے ہیں، نااہل ، ناکام حکومت جب عوامی گھیرے میں آجاتی ہے تو اسطرح کےہتھکنڈے پر اتر آتی ہے لیکن آپ جوبھی ہتھکنڈےاستعمال کریں آپ کو گھر جانا پڑے گا اور جلدی جانا پڑے گا۔