وزیر داخلہ شیخ رشید احمد سے متحدہ عرب امارات کے سفیر کی ملاقات ہوئی ۔

تفصیلات وزیر داخلہ شیخ رشید احمد سے پاکستان میں متحدہ عرب امارات کے سفیر عزت مآب جناب حماد عبید ابراہیم الزابی  نے ملاقات کی۔

ملاقات میں  پاکستان – یو اے ای تعلقات، یو اے ای میں پاکستانی کمیونٹی اور پاکستانی شہریوں پر حالیہ ویزہ پابندی سےمتعلق بات چیت کی گئی۔

عرب امارات میں پاکستانی قیدیوں کی جلد سے جلد بازیابی کے لیے تعاون بڑھانے پر زور دیا گیا۔

شیخ رشید نے کہا کہ پاکستان اورعرب امارات کے درمیان دیرینہ تعلقات ہیں ۔ پاکستانی شہریوں پر ویزہ پابندی کا جلد از جلد خاتمہ ہونا چاہیئے۔

متحدہ عرب امارات کے سفیر نے کہا کہ پاکستانی شہریوں پر یو اے ای ویزہ پابندی عارضی ہے۔

سفیر نے وزیر داخلہ کو یقین دہانی کرائی کہ ویزہ بحالی سے متعلق بات چیت جاری ہے۔ امید ہے ویزہ بحالی جلدممکن ہوجائے گی۔

وزیر داخلہ کا کہنا تھا کہ عرب امارات میں پندرہ لاکھ پاکستانی ورکرز قیمتی اثاثہ ہیں جو سالانہ تقریباً 5 ارب ڈالر زرمبادلہ پاکستان بھیجتے ہیں۔

انہوں نے مزید کہا کہ ان پاکستانیوں کی دیکھ بھال ہماری مشترکہ ذمہ داری ہے۔عرب امارات میں قید پاکستانیوں کو جلد لانے کے اقدامات پر یو اے ای حکومت کا تعاون درکار ہوگا۔

یو اے ای سفیر نے کہا کہ عرب امارات کی ترقی میں پاکستانی کمیونٹی کا کردار مثالی ہے۔ان کی دیکھ بھال ہماری ترجیحات میں شامل ہے۔ وزیراعظم عمران خان کے دور حکومت میں پاکستان اور عرب امارات کے درمیان تعلقات میں بہتری آئی ہے۔

شیخ رشید نے کہا کہ پاکستان اور عرب امارات کے درمیان تعلقات باہمی بھائی چارےاورمحبت پر مبنی ہیں۔  باہمی تعلقات کے مزید فروغ کےلیے  کوششیں جاری رکھیں گے۔

عرب امارات کے سفیر نے شیخ رشید احمد کو وزارت داخلہ کا چارج سنبھالنے پر مبارکباد  بھی پیش کی ۔