کراچی کے  ضلع وسطی میں اسمارٹ لاک ڈاؤن  میں 16 دسمبر تک توسیع کردی گئی ہے۔

تفصیلات کے مطابق  کورونا وائرس پھیلنے  کے خطرے کے پیش نظر  ضلع وسطی کے مختلف علاقوں میں مائیکرو  اور  اسمارٹ لاک ڈاؤن میں توسیع16 دسمبر تک توسیع کردی گئی ہے۔

ضلع وسطی کے مخصوص علاقے مزید 14 روز کے  لیے سیل رکھنے کا فیصلہ کیا گیا ہے۔ ڈپٹی کمشنر ضلع وسطی نے نوٹیفکیشن جاری کر دیا ہے۔

ضلع وسطی کی 19 یونین کمیٹی مائیکرو اسمارٹ لاک ڈاؤن کے تحت بند کی جائیں گی  جن میں   عزیزآباد، علی آباد، کریم آباد، یاسین آباد،  دستگیر، ناظم آباد، اصغر شاہ اسٹیڈیم، شادمان ٹاؤن کے علاقے سیل ہوں گے۔

نارتھ کراچی، مسلم ٹاؤن  اور فردوس کالونی بھی مائیکرو اسمارٹ لاک ڈاؤن کی زد میں آئیں گے۔

ضلع وسطی کے 82 علاقوں میں مخصوص گھروں کو سیل کیا جائے گا۔  مائیکرو اسمارٹ لاک ڈاؤن 16 دسمبر تک نافذ رہے گا۔

کراچی میں مائیکرو اسمارٹ لاک ڈاؤن کے تحت  ان   علاقوں میں آنے اور جانے والے افراد پر لازمی ہو گا کہ وہ ماسک پہنیں۔  لوگوں کی نقل و حرکت کو سختی سے محدود رکھا جائےگا۔

پرچون کی دکانیں، میڈیکل اسٹور اور دیگر ضروری اشیا کی دکانیں محکمہ داخلہ کے گذشتہ نوٹیفکیشن کے مطابق مختص اوقات میں کھلنے کی اجازت ہو گی۔  جبکہ ان علاقوں میں کسی قسم کی کھانے کی ہوم ڈلیوری یا باہر سے لانے کی اجازت نہیں ہو گی۔

‎ان علاقوں میں آنے والے صنعتی اور تجارتی مراکز بند رہیں گے۔    ہر گھر کے ایک فرد کو کھانے پینے کی اشیا کی خریداری کرنے کی مشروط اجازت ہو گی اور اس کو اپنا شناختی کارڈ قانون نافذ کرنے والے اداروں کو دکھانا ہو گا۔

گھروں میں کسی بھی قسم کی تقریبات کی اجازت نہیں ہو گی۔علاقہ مکینوں سے ملاقات کے لیے آنے والوں کو ٹھوس وجہ بتانا ہو گی۔