انسداد دہشت گردی کی عدالت نے 6سال بعد ایئر پورٹ حملہ کیس کا بڑا فیصلہ جاری کردیا ۔

تفصیلات کے مطابق عدالت نے  مقدمے میں نامزد اے پی ایم ایل سندھ کے کنوینیر سرمد صدیقی سمیت 4ملزمان کو بری کردیا۔

عدالت نے اپنے فیصلے میں کہا کہ پراسیکیوشن کالعدم تحریک طالبان کے سہولت کاروں پر جرم ثابت کرنے میں ناکام رہا۔

بری ہونے والے ملزمان میں ندیم عرف برگر،آصف ظہیر اور عبدالراشد شامل ہیں۔

عدالت نے کالعدم تحریک طالبان کے ملا فضل اللہ ، ترجمان شاہد اللہ شاہد سمیت 8مفرور ملزمان کے تاحیات وارنٹ گرفتاری  بھی جاری کردیے۔

یاد رہے کہ 8 جون 2014کو ایئر پورٹ پر 10دہشت گردوں نے حملہ کیا  تھا۔ حملے میں سیکیورٹی اہلکار اور ائیر پورٹ ملازمین سمیت 27افراد مارے گئے  تھے۔ مقابلے میں 10دہشت گرد بھی ہلاک ہوئے  تھے۔

پولیس حکام کا کہنا تھا کہ واقعے  کے بعد سرمد صدیقی و دیگر کو گرفتار کیا گیا  تھا۔ ملزمان نے ہلاک دہشت گردوں کو سہولت فراہم کی تھی۔ ملزمان نے دہشت گردوں کو لاجسٹک ، اسلحہ اور فنڈ فراہم کیا  تھا۔

ملزم سرمد کے وکیل نے کہا کہ  مقدمے  میں 98میں 39گواہان نے بیانات قلمبند کرائے ۔سی ٹی ڈی کی جانب سے ملزمان کے خلاف کوئی ٹھوس شواہد پیش نہیں کیے گئے ۔

عدالت  نے ریمارکس میں کہا کہ پراسیکیوشن دہشتگردوں کے سہولت کاروں پر جرم ثابت کرنے میں ناکام رہا ،ملزمان کسی اور مقدمہ میں نامزد نہیں تو رہا کردیا جائے ۔