وزیراعظم کے معاون خصوصی برائے قومی صحت ڈاکٹر فیصل سلطان نے کہا ہے کہ کورونا کی دوسری لہر گزشتہ لہر سے کہیں زیادہ مہلک ہے۔

تفصیلات کے مطابق میڈیا سے بات چیت کرتے ہوئے وزیراعظم کے معاون خصوصی برائے قومی صحت ڈاکٹر فیصل سلطان نے کہا ہے کہ کورونا وائرس کی وبا کی دوسری لہر تیزی سے پھیل رہی ہے،پچھلے 24 گھنٹوں کے دوران 89 اموات ریکارڈ کی گئیں جو کہ گزشتہ عرصے میں سب سے زیادہ ہیں۔

انہوں نے کہا ہے کہ کورونا کی دوسری لہر کے باعث ہماری معیشت ، تعلیم اور صحت کی دیکھ بھال بری طرح متاثر ہوسکتی ہے۔

انہوں نے کہا کہ دوسری لہر نے انفرادی اور اجتماعی طور پر ہماری زندگیوں کو متاثر کیا۔پہلی لہر کے دوران سائنسی انداز اور طریقوں سے کورونا وائرس کی پہلی لہر پر قابو پانے میں مدد ملی ہے۔

معاون خصوصی نے کہا کہ ہم این سی او سی کے پلیٹ فارم سے تمام اسٹیک ہولڈرز سے کورونا ایس او پیز پر عمل کی درخواست کرتے ہیں۔باہر نکلتے وقت ماسک پہنیں ، بھیڑ والی جگہوں سے گریز کریں ، ہاتھ دھوئیں اور معاشرتی فاصلہ کو یقینی بنائیں۔

ڈاکٹرفیصل سلطان نے تمام محکموں سے درخواست کی جاتی ہے کہ وہ اپنے عملہ اور دفاتر میں ایس او پیز کو یقینی بنائیں۔اگر ہم ان ہدایات پر عمل کرتے ہیں تو جس طرح سے ہم نے پہلی لہر پر قابو پایا تھا ایسے ہی ہم دوسری لہر کے پھیلاؤ کو کم کرنے میں کامیاب ہو سکیں گے۔