وزیر اطلاعات پنجاب فردوس عاشق اعوان کا کہنا ہے کہ  گلگت بلتستان کے عوام نے ووٹ کو عزت دی۔

تفصیلات کے مطابق  وزیر اطلاعات پنجاب فردوس عاشق اعوان  نے نیوز کانفرنس میں وزیر اعلیٰ گلگت بلتستان خالد خورشید کو مبارکباد پیش کرتے ہوئے کہا کہ  گلگت بلتستان کے عوام نے ووٹ کو عزت دی۔

فردوس عاشق اعوان نے کہا کہ  گلگت بلتستان کے عوام نے ذاتیات  کے بیانیے کو مسترد کردیا۔

انہوں نے کہا کہ امید ہے خالد خورشید گلگت بلتستان کی ترقی میں کلیدی کردار ادا کریں گےاور گلگت بلتستان میں وزیراعظم کا ویژن آگے بڑھائیں گے۔

صوبائی وزیر اطلاعات نے کہا کہ  عوام کے مسائل کا حل پنجاب حکومت کی اولین ترجیح ہے ۔ پنجاب حکومت اداروں کے لیے ڈیجیٹلائز پالیسی پر عمل پیرا  ہے۔پنجاب انفارمیشن اکیڈمی کے قیام  کے لیے تجویز وزیراعلیٰ کو پیش کی جائے گی۔

فردوس عاشق اعوان نے کہا کہ  حکومت جدید سہولتوں سے مزین بس ٹرمینل ٹھوکر نیاز بیگ کے قریب بنا رہی ہے۔ جدید بس ٹرمینل میں عوام کو سفر سے متعلق تمام سہولتیں فراہم ہوں گی۔

انہوں نے کہا کہ  مواصلات کا نظام بہتر بنانا پنجاب حکومت کی اولین ترجیح ہے۔ ماحولیاتی آلودگی اور اسموگ کے خاتمے کے لیے الیکٹرک بسیں چلائی جائیں گی۔ محکمہ ٹرانسپورٹ کو دسمبر تک بس ٹرمینل کا ڈیزائن پیش کرنے کی ہدایت کی گئی ہے ۔