اقتصادی رابطہ کمیٹی (ای سی سی) نے  کراچی ٹرانسفارمیشن پلان کی منظوری اگلے اجلاس تک موخر کردی۔

تفصیلات کے مطابق  وزیرخزانہ عبدالحفیظ شیخ کی زیر صدارت اقتصادی رابطہ کمیٹی (ای سی سی )کا اہم اجلاس ہوا۔

اجلاس میں ای سی سی نے الیکٹریکل وہیکل پالیسی کی منظوری دے دی۔ ای سی سی نے مقامی طور پر تیار کردہ موبائل فونز پر عائد 4 فیصد سیلز ٹیکس ختم کرنے کی بھی اصولی منظوری دے دی۔

اسلام آباد میں نو تعمیر شدہ آئسولیشن اسپتال اور انفیکشنز ٹریٹمنٹ سینٹر  کے لیے 21 کروڑ 93 لاکھ روپے کی سپلیمنٹری گرانٹ  کی منظوری بھی دے دی گئی۔

پاکستان کے ڈبلیو ایچ او  کے لیے کنٹری بیوشن کی مد میں 30 کروڑ 54 لاکھ  روپے کی ضمنی گرانٹ کی منظوری دے دی گئی۔  اسلام آباد انتظامیہ کے منصوبوں  کے لیے بھی 10 کروڑ 67 لاکھ روپے کی ضمنی گرانٹ کی منظوری دے دی گئی۔

ای سی سی نے فاٹا کے متاثرین  کے لیے 70 کروڑ 68 لاکھ روپے کی ضمنی گرانٹ  بھی منظور کرلی۔ مختلف عالمی اداروں میں سالانہ کنٹری بیوشن کی مد میں 27 کروڑ 78 لاکھ روپے کی ضمنی گرانٹ  کی بھی منظوری  دے دی گئی۔

کورونا وائرس کی روک تھام  کے لیے میڈیکل آلات، مشینری اور ادویات  کے لیے 5 کروڑ 31 لاکھ روپے کی ضمنی گرانٹ بھی منظور کرلی گئی۔

اجلاس میں سبسڈیز کو معقول کرنے کے حوالے سے سمری پر بھی غور ہوا۔ای سی سی نے گندم اور چینی کی درآمد اور دستیابی کا بھی جائزہ لیا۔

ای سی سی نے آف شور پاکستانی روپے سے وابستہ بانڈز کے اجراء کی بھی منظوری دی۔ای سی سی نے کراچی ٹرانسفارمیشن پلان کی منظوری اگلے اجلاس تک موخر کردی۔