قومی احتساب بیورو(نیب ) نے کرپشن کے الزامات پر جمیعت علمائے اسلام (ف) کے سربراہ مولانا فضل الرحمان کو سوالنامہ بھجوادیا۔

ذرائع کے مطابق نیب  خیبر پختونخوا نے کرپشن کے الزامات پر جمیعت علمائے اسلام (ف) کے سربراہ مولانا فضل الرحمان کو 26 سوالات پر مشتمل سوالنامہ بھجوادیا۔

نیب ذرائع کا کہنا ہے کہ  مولانا فضل الرحمان کو 24 دسمبر تک جواب جمع کرانے کی ہدایت  کی گئی ہے۔ جواب جمع نہ کرایا تو قانون کے مطابق کارروائی عمل میں لائی جائے  گی۔

نیب ذرائع کا کہنا ہے کہ مولانا فضل الرحمان  کو جواب کے ساتھ ثبوت بھی پیش  کرنے کی ہدایت کی گئی ہے۔

ذرائع کے مطابق سوالنامے میں مولانا فضل الرحمان   سے  پارٹی کو فنڈنگ اور الیکشن اخراجات کی تفصیل سے متعلق پوچھا گیا ہے۔

مولانا فضل الرحمان کو ان کے اور خاندان کے بیرون ملک دوروں کے مقاصد  اور اپنے اکاؤنٹس کی تفصیلات بتانے  کی بھی ہدایت کی گئی ہے۔

نیب نے سوال کیا ہے کہ مولانا فضل الرحمان اپنی سرپرستی میں چلنے والے مدارس  کی تفصیلات بتائیں اور   ان مدارس سے حاصل ہونے والی آمدن کی تفصیلات بھی بتائیں۔ اپنے مدارس کے اکاؤنٹس ،اثاثوں اور رجسٹریشن کی تفصیل دیں۔

 مولانا فضل الرحمان اپنی جماعت کے اثاثے بھی بتائیں اور  ٹیکس گوشواروں کی تفصیلات سے بھی آگاہ کریں۔

ذرائع کا کہنا ہے کہ نیب کی جانب سے مولانا فضل الرحمان سے سوال کیا گیا ہے کہ آپ اتنی شاہانہ زندگی کیسے گزار رہے ہیں؟ اخراجات کیسے پورے کرتے ہیں  تفصیلی جواب جمع کرائیں۔ کیا یہ بات درست ہے کہ اپنے بھائی کو سرکاری نوکری دلوانے کے لیے سیاسی اثر و رسوخ استعمال کیا۔