نیشنل الیکٹرک پاور ریگولیٹری اتھارٹی (نیپرا) نے بجلی کی قیمت میں اضافے کی منظوری دے دی۔

تفصیلات کے مطابق  چیئرمین نیپرا کی سربراہی میں اتھارٹی نے سینٹرل پاور پرچیزنگ ایجنسی کی اکتوبر اور نومبر کی فیول پرائس ایڈجسٹمنٹ کی مد میں بجلی مہنگی کرنے کی درخواست پر سماعت کی۔

سی پی پی اےکی جانب سے موقف اپنایا گیا کہ فرنس آئل سےبجلی پیدوار پر 15 ارب روپے کی کٹوتی ہوچکی ہے، اگر فرنس آئل والے پلانٹس نہیں چلانے تو پھر ان کو میرٹ آرڈر سے ہٹا کر بند کر دیاجائے۔ اکتوبر میں 650کی بجائے 627ایم ایم سی ایف ڈٰی گیس فراہم کی گئی۔

نیپرا حکام نے بتایا کہ ایل این جی کی کمی سے پلانٹس فرنس آئل پر چلائے گئے جس پر چیئرمین نیپرا کا کہنا تھا کہ اگر گیس کوٹہ نہیں مل رہا تو اس کی فراہمی یقینی بنانے  کے لیے کوشش کرنی چاہیے۔

نیشنل ٹرانسمیشن اینڈ ڈسپیچ کمپنی کے حکام موقف اپنایا کہ فرنس آئل والے پلانٹس چلانے دیں یا لوڈشیڈنگ ہونے دیں۔

وائس چیئرمین نیپرا سیف اللہ چٹھہ نے کہا کہ لوڈشیڈنگ کرنے کے حق میں بالکل بھی نہیں، کیونکہ گھریلو،کمرشل اورصنعتی صارفین کے لیے لوڈشیڈنگ کسی صورت سودمند نہیں۔

اس موقع پر چیئرمین نیپرا کا کہنا تھا کہ 19 ارب کافرنس آئل جلادیا گیا اگر اس میں سے ایک ارب سسٹم بہتری کے لیے لگ جاتے تو زیادہ بہترہوتا۔

نیپرا نے سماعت مکمل ہونے پر اکتوبر، نومبر 2020 کی فیول پرائس ایڈجسٹمنٹ کی مد میں بجلی 1روپے6 پیسے مہنگی کرنے کی منظوری دے دی۔

اکتوبر کی فیول پرائس ایڈجسٹمنٹ کی مد میں بجلی 29پیسے فی یونٹ جبکہ نومبر کی فیول پرائس ایڈجسٹمنٹ کی مدمیں بجلی 77 پیسے مہنگی کی گئی ہے۔

بجلی کی قیمت میں اضافے سے صارفین پر 8ارب 40کروڑ روپے کا بوجھ پڑے گا۔