وفاقی وزیر برائے اطلاعات شبلی فراز نے کہا ہے کہ پی ڈی ایم کی دھمکی پر وزیراعظم عمران خان کبھی بھی استعفی نہیں دیں گے۔

تفصیلات کے مطابق پریس کانفرنس کرتے ہوئے وفاقی وزیر برائے اطلاعات شبلی فراز نے کہا ہے کہ سندھ اسمبلی توڑنے سے الیکٹورل کالج ختم نہیں ہو گا اور اگر اسمبلی ٹوٹ بھی گئی تو دوسرے صوبوں میں الیکشن ہو جائیں گے۔

وفاقی وزیر کا کہنا تھا کہ سینیٹ الیکشن شفاف ہونے چاہیے اور اس حوالے سے سپریم کورٹ سے رجوع کیا جائے گا تاہم شو آف ہینڈ سے متعلق الیکشن قوانین میں آئینی ترمیم کی ضرورت ہے یا سادہ اکثریت، اس کا جائزہ لیا گیا ہے۔

شبلی فراز نے عندیہ دیا ہے کہ سینیٹ انتخابات مارچ یا اس سے پہلے ہو جائیں گے اور ہم نے سینیٹ انتخابات کی شفافیت کی ہمیشہ کوشش کی ہے جبکہ ہمارا مدعا یہی ہے کہ شو آف ہینڈ سے سینیٹ الیکشن ہو۔

ان کا کہنا تھا کہ لاہور میں 11 پارٹیوں کا جلسہ بری طرح سے ناکام ہوا ہے کیونکہ عوام باشعور ہیں۔

انہوں نے کہا کہ اپوزیشن والے ناکامی کے بعد اب ایک دوسرے کو الزامات دے رہے ہیں جبکہ استعفوں اور لانگ مارچ پر اپوزیشن جماعتیں ایک پیج پر نہیں ہیں اور یہ واضح ہو چکا ہے۔

شبلی فراز کا کہنا تھا کہا اپوزیشن جماعتوں کی جانب سے  میڈیا کو دھمکیاں دینے کی مذمت کرتے ہیں کیونکہ اپوزیشن  چاہتے ہیں کہ عدالتوں کے فیصلے اور میڈیا انکی منشا کے مطابق خبر چلائے۔