لائن آف کنٹرول(ایل او سی )پر جنگ بندی کی خلاف ورزی کرنے پر پاکستان نے سینئر بھارتی سفارت کار کو دفتر خارجہ طلب کرلیا۔

ترجمان دفترخارجہ کے مطابق  بھارت کی جانب سے ایل او سی پر جنگ بندی کی خلاف ورزی کرنے پر پاکستان  نے بھارتی ہائی کمیشن کے سینئر سفارت کار کو طلب کر کے  سخت احتجاج کیا۔

زاہد حفیظ چوہدری کا کہنا ہے کہ 11  جنوری کو نیزہ پیر سیکٹر میں بھارتی قابض افواج نے بلا اشتعال فائرنگ و گولہ باری کی۔ بلا اشتعال فائرنگ و گولہ باری کے نتیجے میں 10 سالہ محمد ظہیر ولد محمد رفیق شدید زخمی  ہوگیا۔

انہوں نے مزید کہا کہ   رواں برس بھارتی قابض افواج نے جنگ بندی کی 48 خلاف ورزیاں کیں۔ ان خلاف ورزیوں میں 3 نہتے شہری شدید زخمی ہوئے۔ بھارت کا معصوم شہریوں کو جان بوجھ کر نشانہ بنانا قابل مذمت ہے۔

ترجمان دفتر خارجہ نے کہا کہ  بھارتی فورسز مسلسل لائن آف کنٹرول، ورکنگ باونڈری پر شہری آبادی کو نشانہ بنا رہی ہیں۔ بھارت کی پے در پے اشتعال انگیزیاں خطے میں امن و سلامتی کے لیے خطرہ ہیں۔

زاہد حفیظ چوہدری نے کہا کہ  بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا۔  بھارت اقوام متحدہ سلامتی کونسل کی قراردادوں پر عمل درآمد یقینی بنائےاور   2003ء کے جنگ بندی انتظام کی پاسداری کرے۔

انہوں نے کہا کہ ہندوستان کا نہتے شہریوں کو نشانہ بنانا عالمی قوانین اوراقدار کے منافی ہے۔اقوام متحدہ فوجی مبصر مشن کو ایل او سی پر کام کرنے دیا جائے۔