وفاقی وزیر اطلاعات سینیٹر شبلی فراز کا کہنا ہے کہ  حکومت آزادی اظہار رائے پر کامل یقین رکھتی ہے۔

تفصیلات کے مطابق  وفاقی وزیر اطلاعات سینیٹر شبلی فراز سے ایبٹ آباد پریس کلب کے عہدیداران  نے ملاقات کی۔

ملاقات میں   ایم این اے علی خان جدون بھی موجود تھے۔

صدر ایبٹ آباد پریس کلب نے وفاقی وزیر کو درپیش مسائل اور دیگر  امورسے آگا ہ کیا۔

اس موقع پر وفاقی وزیر اطلاعات نے کہا کہ   حکومت آزادی اظہار رائے پر کامل یقین رکھتی ہے۔   ملک میں آزاد اور ذمہ دار صحافت کے فروغ کے  لیے کوشاں رہیں گے۔

شبلی فراز نے کہا کہ  میڈیا  کے لیے ساز گار ماحول کی فراہمی یقینی بنانے  کے  لیے تمام ممکن اقدامات اٹھا رہے ہیں ۔ صحافیوں کے فلاح اور تحفظ کے حوالے سےجرنلسٹ پروٹیکشن بل لارہے ہیں۔

انہوں نے مزید کہا کہ کورونا سے جہاں معاشرے کے دیگر طبقات متاثر ہوئے ہیں وہیں صحافتی برادری بھی متاثر ہوئی ہے۔  صحافیوں کیلئے بھی صحت انصاف کارڈ کی  فراہمی کی تجویز زیر غور ہے تا کہ صحافیوں کو علاج کی بہترین سہولیات میسر آسکیں۔

وزیر اطلاعات کا کہنا تھا کہ  پریس کلبز ممبرشپ کا ایسا طریقہ کار واضح کریں جس سے عامل صحافیوں کی حوصلہ  افزائی ہوسکے۔

شبلی فراز نے کہا کہ  پی ٹی وی، ریڈیو پاکستان اور اے پی پی میں دیگر علاقائی زبانوں کی طرح ہندکو زبان کی بھی ترویج ہونی چاہیے۔

وفاقی وزیر نے ایبٹ پریس کلب کی جانب سے دورےکی دعوت قبول کی اور جلد ایبٹ آباد پریس کلب  کے دورےکی یقین دہانی کرائی۔

ایبٹ آباد پریس کلب کے صدر نے اپنے دیگر عہدیداران کی جانب سے گذشتہ سال ایبٹ آباد پریس کلب کی 40سالہ تقریبات میں سینیٹر شبلی فراز کی شرکت کا بھی شکریہ ادا کیا۔