وزیر اعظم عمران خان کا کہنا ہے کہ  پاکستان میں سرمایہ کاری کے حوالے سے بے پناہ مواقع  موجودہیں۔

تفصیلات کے مطابق وزیر اعظم عمران خان سے  سے ظہبی گروپ کے وفد  نے ملاقات کی۔

وفد میں ظہبی گروپ کے سی ای او تنویر حسین اعوان، ڈائریکٹر سلمان ناصر عبداللہ البدی اور پاکستان کے کنٹری ہیڈ محمد شہباز خان شامل تھے۔

عبدالرزاق داؤد، سید ذوالفقار عباس بخاری ، شہریار خان آفریدی اور چیئرمین بی او آئی عاطف بخاری بھی ملاقات میں شریک تھے۔

وفد نے وزیر اعظم کے ملک میں سرمایہ کاری کے فروغ کے ویژن اور بیرونی سرمایہ کار کمپنیوں کے لیے سرمایہ کاری میں آسانیاں فراہم کرنے کے اقدامات کی تعریف  کرتے ہوئے  مستقبل میں سرمایہ کاری میں اضافے کے حوالے سے گہری دلچسپی کا اظہار کیا۔

سی ای او ظہبی گروپ کا کہنا تھا کہ   وزیراعظم کی قیادت میں ملک میں معاشی استحکام کے حوالے سے اقدامات لائق تحسین ہیں۔

انہوں نے مزید کہا کہ موجودہ حکومت کی سرمایہ کار دوست پالیسیوں کی بدولت عالمی سرمایہ کار کمپنیوں کا پاکستان میں سرمایہ کاری کے حوالے سے اعتماد بحال ہوا ہے ۔

وفد نے موجودہ حکومت کی سرمایہ کار دوست پالیسیوں پر بھرپور اعتماد کا اظہار کیا۔

وفد نے بتایا کہ ظہبی گروپ کے لاہور میں اعلیٰ تعمیراتی منصوبے مبارک سینٹر، جو گذشتہ 15 سالوں سے التوا کا شکار تھا، کاآغاز کیا جا رہا ہے۔

وفد نے حکومت پاکستان کی جانب سے گروپ کو سرمایہ کاری کے حوالے سے آسانیوں کی فراہمی پر وزیراعظم کا تہہ دل سے شکریہ ادا کیا۔

اس موقع پر وزیر اعظم عمران خان کا کہنا تھا کہ  پاکستان میں سرمایہ کاری کے حوالے سے بے پناہ مواقع ہیں۔

وزیراعظم  نے ایز آف ڈوئنگ بزنس کے حوالے سے حکومتی اقدامات اور بین الاقوامی سرمایہ کار کمپنیوں کو ون ونڈو کے تحت سہولت فراہم کرنے کے حوالے سے ذکر کیا۔

عمران خان نے کہا کہ   حکومت بین الاقوامی سرمایہ کار کمپنیوں کو پاکستان کے مختلف شعبوں میں سرمایہ کاری کے حوالے سے ہر ممکن سہولت فراہم کرے گی۔

وزیراعظم نے ظہبی گروپ کی جانب سے مستقبل میں مزید سرمایہ کاری کے حوالے سے گہری دلچسپی کو سراہتے ہوئے کہا کہ     پاکستان میں سیاحت کے شعبے میں سرمایہ کاری کے حوالے سے بے پناہ مواقع ہیں۔