وفاقی وزیر اطلاعات ونشریات سینیٹر شبلی فراز سے کیوبا کے سفیر گیبریل ٹیل کیپوٹ کی الوداعی ملاقات کی جس میں مختلف امور پر تبادلہ خیال کیا گیا ۔

وفاقی وزیر اطلاعات سینیٹر شبلی فراز نے ثقافت کے شعبے میں تعاون پر زوردیتے ہوئے کہا کہ پاکستان عظیم اور متنوع ثقافتی ورثے کا امین ہے ‘ ثقافت اور میڈیا کے شعبوں میںدوطرفہ تعاون کے فروغ میں مدد گار ثابت ہوگا ۔

وزیر اطلاعات نے 2005 میں پاکستان کے زلزلے سے بری طرح متاثرہونے والے علاقوں کے طالبعلموں کو طبی شعبے میں پیش کیے جانے والے اسکالرشپ پر کیوبا کے سفیر کا خصوصی طور پر شکریہ ادا کرتے ہوئے کہا کہ پاکستانی طلباءکی کثیرتعداد نے ان طبی سکالرشپ سے استفادہ حاصل کیا ہے۔

انہوں نے کہا کہ کیوبا کے عوام ایک باہمت قوم ہیں جنہوں نے کھیلوں ، موسیقی اور طب کے شعبوں میں نمایاں خدمات سرانجام دیں ۔کیوبا کے سفیر نے کیوبا اور اس کے عوام کے بارے میں وزیراطلاعات کے خیالات کو سراہا ہے ۔

کیوبا کے سفیر نے دونوں ممالک کے عوام کے باہمی مفاد کےلئے کیوبا اور پاکستان کے مابین مختلف شعبوں میں معاہدوں پرعمل درآمدکی ضرورت پر زور دیا۔ دونوں فریقین نے کوویڈ 19 وبائی امراض کا مقابلہ کرنے کے لئے اپنی حکومتوں کے اقدامات پر تبادلہ خیال کیا۔

وزیراطلاعات نے کیوبا کے سفیر کے لئے اپنی مستقبل کی سفارتی ذمہ داریوں کے بارے نیک خواہشات کا اظہار کیا اور امید کی کہ وہ اپنے پاکستان کے قیام کے دوران اچھی یادوں کو ساتھ رکھیں گے۔ ملاقات میں وزارت اطلاعات و نشریات کے اعلی حکام شریک تھے۔