سردیوں کے موسم میں بجلی کا بریک ڈائون، ملک بھر میں بجلی کا ایک اور بڑا بریک ڈاؤن ہوگیا ہے۔

تفصیلات کے مطابق نیشنل پاور کنٹرول سینٹر نے ملک بھر میں مکمل بریک ڈاون کی تصدیق کردی ہے۔

ذرائع کے مطابق ملک کے بیشتر تمام بڑے شہروں میں بجلی کا بریک ڈاون ہوگیا ہے۔

اسلام آباد، راولپنڈی، لاہور، کراچی، پشاور سمیت دیگر شہروں میں بجلی چلی گئی جبکہ کوئٹہ سمیت دیگر شہروں میں بھی بجلی بند ہے۔

تفصیلات کے مطابق کراچی کے بڑے علاقے  بجلی سے محروم ہوچکے ہیں جبکہ شدید دھند اور سردی سے لائنیں ٹرپ کرگئیں ہیں۔

ترجمان کے الیکٹرک کا کہنا ہے کہ این ٹی ڈی سی بجلی بریک ڈاؤن کی وجوہات معلوم کررہی ہے۔

ترجمان پاور ڈیژن کا کہنا ہے کہ بجلی کے ترسیلی نظام میں فریکوینسی اچانک 50سے 0 پر آنے کی وجہ سے ملک میں بجلی کا بلیک آؤٹ ہے،

فریکونسی گرنے کی وجہ جاننے کی کوشش کی جارہی رہی ہے، اس وقت تربیلا کو چلانے کی کوشش ہو رہی ہے جس سے ترتیب وار بجلی کا نظام بحال کیا جائے گا۔

نیشنل پاور کنٹرول سنٹر حکام کا کہنا ہے کہ ملک میں بجلی کا بڑا بریک ڈاؤن سسٹم میں فنی خرابی ہوئی ہے۔

ذرائع کے مطابق لاہور، گوجرانوالہ، سیالکوٹ، اسلام آباد، سرگودہا، قصور میں ایک ہی وقت میں بجلی غائب ہوگئی ہے۔

ملک بھر میں بجلی کے تعطل سے بعض شہروں میں انٹرنیٹ سروس بھی معطل ہوگئی ہے۔

ذرائع کے مطابق منگلا کے ٹرپ ہونے اور پاور سسٹم سے یکدم نکلنے کے باعث بجلی کی فریکوئینسی پچاس سے نیچے گر گئی، بجلی فریکوئینسی یکدم گرنے کے باعث دیگر تمام پاور ہاؤسز یکے بعد دیگرے بند ہوے گئے، ملک بھر میں مکمل بریک ڈاؤن کیسکیڈنگ کے باعث پیش آیا، سسٹم کی بحالی کے لئے کئی گھنٹے درکار ہیں، پہلے ایک پاور ہاؤس کی بجلی چلائی جائیگی اور فریکوئینسی کو مانیٹر کیا جائیگا، بجلی فریکوئینسی پچاس سے اوپر جانے اور مستحکم ہونے کی صورت میں سسٹم میں شامل کی جائیگی۔

دیگر تمام پاور ہاوسز کی بجلی بھی یکے بعد دیگرے اسی نظام کے تحت سسٹم میں شامل ہوگی، اس پورے نظام کی بحالی میں کئی گھنٹے درکار ہونگے۔