وفاقی وزیر اطلاعات شبلی فراز کا کہنا ہے کہ  تیس سالوں کی غلطیوں کو تیس ماہ میں ٹھیک نہیں کرسکتے ہیں۔

وفاقی وزیر اطلاعات شبلی فراز نے اپر دیر پریس کلب کے نومنتخب عہدیداران سے حلف لینے کے بعد پریس کانفرنس میں کہا کہ  خیبرپختونخواہ کے دور دراز علاقوں کے صحافیوں کو درپیش مسائل کا ادراک ہے، جلد خیبرپختونخواہ پریس کلب میں جاؤں گا۔

شبلی فراز نے کہا کہ  حکومت صحافیوں کو درپیش مسائل کے حل  کے لیے پرعزم ہے۔ صحافت کے ذریعے ملکی مفادات کا تحفظ ایک عظیم فریضہ ہے۔

انہوں نے مزید کہا کہ آج ایک مشکل دن ہے،سرکاری ملازمین کے احتجاج کے باعث راستے بند ہیں۔وفاقی ملازمین کے احتجاج پر وزیر اعظم نے تشویش کا اظہار کرتے ہوئے  متعلقہ وزارتوں کو سرکاری ملازمین کی تنخواہوں کا مسئلہ فوری حل کرنے کا حکم دیا  ہے۔

وفاقی وزیر اطلاعات نے کہا کہ  تین رکنی حکومتی کمیٹی وزیراعظم کی خواہش کے مطابق مسائل کو حل کرے گی۔امید ہے مسائل کے حل کی یقین دہانی کے بعد سرکاری ملازمین آج احتجاج ختم کردیں گے۔

شبلی فراز نے کہا کہ پی ڈی ایم سیاسی خود غرضی کی بدترین مثال ہے۔جہاں لوگ اکٹھے ہوتے ہیں پی ڈی ایم پوائنٹ اسکورنگ کرنے پہنچ جاتی ہے۔

انہوں نے مزید کہا کہ آج جو مسائل ہیں وہ گذشتہ حکومتوں کی نا اہلی کے فقدان کے باعث ہیں، تیس سالوں کی غلطیوں کو تیس ماہ میں ٹھیک نہیں کرسکتے۔

وفاقی وزیر اطلاعات نے کہا کہ  کورونا کے باوجود ہر شعبے میں بہتری نظر آرہی ہے،معیشت بہتری کی جانب گامزن ہے۔پاکستان کی کارکردگی خطے کے دیگر ممالک سے بہت بہتر ہے۔آنے والے دنوں میں مہنگائی میں کمی آئے گی اور روزگار کے نئے مواقع پیدا ہوں گے۔