وزیر داخلہ شیخ رشید احمد کا کہنا ہے کہ ہم وفاقی ملازمین کی تنخواہوں سے متعلق کل تک اعلان کردیں گے۔

وفاقی ملازمین کے احتجاج کے معاملے سے متعلق وزیر دفاع پرویز خٹک کے ہمراہ  میڈیا سے گفتگو کرتے  ہوئے وزیر داخلہ شیخ رشید کا کہنا تھا  وفاقی حکومت کے گریڈ ایک سے 16 تک کے ملازمین سے مذاکرات ہوئے ہیں۔

شیخ رشید نے کہا کہ  ہم اٹھارہویں ترمیم کے ساتھ صوبوں کے معاملات طے نہیں کرسکتے تاہم وفاق کے ملازمین کی تنخواہوں سے متعلق کل تک اعلان کردیں گے۔

شیخ رشید نے کہا کہ  وفاقی سرکاری ملازمین کے مطالبات ماننے کا اعلان کل کیا جائے گا۔ دیگر صوبوں کے ملازمین اپنے متعلقہ صوبوں سے رابطہ کریں۔

ایک سوال کے جواب میں وزیر داخلہ نے  کہا کہ وکلاء کے قانون میں ہاتھ لینے سے متعلق بات نہیں کروں گا ۔

وزیر دفاع پرویز خٹک نے کہا کہ  وفاقی اداروں کے ملازمین سے بات حتمی مراحل میں داخل  ہوگئی ہے۔ وفاقی ملازمین نے صوبائی ملازمین کی تنخواہوں  میں بھی اضافے کا مطالبہ کیا ہے تاہم ہم صوبوں کی تنخواہ بڑھانے کے اختیارات نہیں رکھتے۔

پرویز خٹک نے مزید کہا کہ  صوبائی وزرائے اعلیٰ سے، درخواست کرتے ہیں  کہ ملازمین کو بلاکر ان سے بات کریں۔

دوسری جانب ذرائع کا کہنا ہے کہ  سرکاری ملازمین نے حکومتی ٹیم کی بات ماننے سے انکار کرتے ہوئے کل دن دوبجے احتجاجی مظاہرے کا اعلان کردیا ہے۔

ان کا کہنا ہے کہ  تمام سرکاری ملازمین کے مطالبات مانے جائیں۔