وزیر خارجہ شاہ محمود قریشی، وزیر داخلہ شیخ رشید اور چیئرمین سینیٹ صادق سنجرانی نے سینیٹر مشاہد اللہ خان کے انتقال پر تعزیت کا اظہار کیا ہے۔

اس ضمن میں وزیر خارجہ شاہ محمود قریشی نے کہا ہے کہ مشاہد اللہ کی وفات کی خبر سن کر بہت افسوس ہوا ہے، وہ ایک زیرک سیاستدان اور شفیق انسان تھے۔

وزیر داخلہ شیخ رشید نے کہا ہے کہ مسلم لیگ( ن )کے رہنما سینیٹر مشاہداللہ خان کے انتقال پر دکھ اور افسوس کا اظہار کیا ہے۔

انہوں نے دعا کی کہ اللہ تعالیٰ مرحوم کواپنے جوار رحمت میں جگہ عطا فرمائے اور ان کے لواحقین کو صبر جمیل عطا فرمائے۔

اپنے تعزیتی پیغام میں وزیر داخلہ نے کہا کہ مشاہد اللہ ایک متحرک سیاسی کارکن اور پارلیمنٹیرین تھے۔

چیئرمین سینیٹ محمد صادق سنجرانی نے ایوان بالا کے رکن اور پاکستان مسلم لیگ (ن) کے سینیئر راہنما سینٹر مشاہد اللہ خان کے انتقال پر گہرے دکھ اور افسوس کا اظہار کیا ہے۔

اپنے تعزیتی پیغام میں چئیرمین سینیٹ نے کہا کہ مشاہد اللہ خان ایوان بالا کے ایک انتہائی فعال رکن تھے، انکی وفات سے ملک ایک مدبرسیاستدان اور ہم ایک بہترین دوست سے محروم ہوگئے ہیں، سینٹر مشاہد اللہ خان کی وفات ہمارے لیے انتہائی دکھ اور رنج کی گھڑی ہے۔

انہوں نے کہا کہ مشاہد اللہ خان کی ملکی سیاست اور پسماندہ طبقات کے لئے خدمات ہمیشہ یاد رکھی جائیں گی۔

انہوں نے دعا کی کہ اللہ تعالی مرحوم کی مغفرت فرمائے اور مرحوم سینٹر کے اہل خانہ ، رفقاء اور احباب کے لئے صبر جمیل کی دعا بھی کی۔