گذشتہ ماہ ملک میں بلیک آؤٹ ہونے کے معاملے پر نیشنل الیکٹرک اینڈ پاور ریگولیٹری اتھارٹی (نیپرا) نے رپورٹ جاری کردی۔

بجلی کے حالیہ بلیک آؤٹ کےحوالے سے نیپرا رپورٹ میں بتایا گیا کہ گدو تھرمل پاور کے  سوئچ یارڈ میں خرابی کے باعث ملک  بھر میں بلیک آؤ ٹ ہوا۔

نیپرا رپورٹ میں کہا گیا کہ 9 جنوری کو گدو تھرمل پاور  کے سوئچ یارڈ میں خرابی پیدا ہوئی تھی ، متعلقہ سرکٹ بریکر کے درست کام نہ کرنے سے خرابی دورنہ ہوسکی۔

رپورٹ میں مزید کہا گیا کہ سوئچ یارڈمیں خرابی کی وجہ سے 220 اور500 کےوی کی لائنیں ٹرپ کرگئیں جس سے ملک کے شمالی حصے میں پاور پلانٹس پر زیادہ لوڈ پڑا۔

نیپرا رپورٹ میں کہا گیا کہ بجلی کی ترسیل میں عدم توازن کی وجہ سے بجلی کا مکمل بریک ڈاؤن ہوا۔ بعض پاور پلانٹس نے بجلی بحالی  کے لیے معمول سے زیادہ وقت لیا۔

نیپرا کی جانب سے رپورٹ میں مستقبل میں بلیک آؤٹ سے بچنے  کے لیے معروف عالمی ادارے سے جامع اسٹڈی کی سفارش بھی کی گئی۔

نیپرا کی جانب سے پاور پلانٹس میں بلیک اسٹارٹ سہولت کی دستیابی یقینی بنانے  اور   220 میگا واٹ کے پاور ہاؤس میں آئی لینڈ موڈ کی دستیابی کی سفارش بھی کی گئی۔

رپورٹ میں سفارش کی گئی کہ کے الیکٹرک، این ٹی ڈی سی اور پاور پلانٹس بلیک آؤٹ سے بچنے  کے لیے ہنگامی پیشگی اقدامات کریں جبکہ  گدو پاور اسٹیشن میں انتظامی بنیادوں پر اصلاحات کی بھی سفارش کی گئی۔