پاکستان پیپلز پارٹی کے چیئرمین بلاول بھٹو زرداری کا کہنا ہے کہ  پی ٹی آئی کے ممبران  ٹکٹ  کے لیے پاکستان پیپلز پارٹی  سے رابطے کر رہے ہیں۔

پی ایس 88 ملیر سے نومنتخب رکن سندھ اسمبلی یوسف مرتضیٰ بلوچ کی رہائشگاہ پر کارکنان سے خطاب کرتے ہوئے چیئرمین  پیپلز پارٹی بلاول بھٹو زرداری نےکہا کہ  پی ٹی آئی کے ممبران کو بھی پتا ہے کہ یہ حکومت جا رہی ہے، اس لیے ٹکٹ کے لیے پاکستان پیپلز پارٹی  سے رابطے کر رہے ہیں۔

بلاول بھٹو نے  سینیٹ الیکشن کے متعلق صدارتی ریفرنس کو حکمران جماعت کی اپنے ہی ارکان اسمبلی کے خلاف عدم اعتماد کی تحریک قرار دیتے ہوئے کہا کہ  پاکستان ڈیموکریٹک موومنٹ کی سیاسی حکمت عملی کی وجہ سے سلیکٹڈ حکومت پریشان ہے۔

انہوں نے کہا کہ حکومت  کسی نہ کسی سے سینیٹ الیکشن میں دھاندلی کرانا چاہتی ہے، اور بندوق چلانے کے لیے کبھی الیکشن کمیشن تو کبھی سپریم کورٹ کا کندھا استعمال کرنے کی کوشش کر رہی ہے۔

چیئرمین پیپلز پارٹی نے کہا کہ  پاکستان کی عوام کسی کو اجازت نہیں دے گی کہ کوئی پھر سے انتخابات کو متنازعہ بنائے، اور نہ ہی کوئی چور دروازے کے ذریعے نیازی کو اکثریت دلوانے کی ہمت کرے۔  کسی کو اجازت نہیں دیں گے کہ وہ ہمارے اراکین اسمبلی کے حق پر ڈاکا ڈالے۔

بلاول بھٹو نے سوال کیا کہ جب 2018ع میں عوام کے حق پر ڈاکا ڈالا گیا تھا تو کیا کسی نے سوموٹو نوٹس لیا تھا؟

انہوں نے کہا کہ اگر زبردستی اراکین اسمبلی کی خفیہ ووٹنگ اور مرضی سے ووٹ دینے کا حق چھینا جائے گا تو یہ جمہوریت پر حملہ ہوگا۔

چیئرمین پیپلز پارٹی نے کہا کہ  اگر حکمرانوں کو اپنے ارکان اسمبلی پر اعتماد ہے تو پھر وہ چور دروازوں سے کیوں آنا چاہتے ہیں، وہ اپوزیشن کا سامنے آکر جمہوری مقابلہ کریں۔

بلاول بھٹو زرداری نے کہا کہ حکمران جماعت کے ممبرز عمران خان کے کہنے پر کیوں ووٹ دیں گے، جنہیں نظر آ رہا ہے کہ الیکشن کراچی میں ہو یا سانگھڑ میں، پاکستان پیپلز پارٹی ہر جگہ پی ٹی آئی کو عبرتناک شکست دے رہی ہے، اور اسی وجہ سے وہ خوشی خوشی پاکستان پیپلز پارٹی کے پاس آ رہے ہیں۔

انہوں نے مزید کہا کہ جمہوریت کسی فرعون کے حکم کے مطابق نہیں چلتی  ۔یہ کس قسم کا مذاق ہے کہ جب ہم کہتے ہیں کہ آئین اور قانون کے مطابق الیکشن کرو تو پھر میڈیا میں فوٹو شاپ ویڈیوز آجاتے ہیں۔

پی پی پی چیئرمین کا کہنا تھا کہ یہ سب کچھ جمہوریت اور سینیٹ کے انتخابات کے خلاف سازش ہے۔

انہوں نے کہا کہ وہ سلیکڈ حکومت کے خلاف ہر محاذ پر لڑ رہے ہیں اور انہیں شکست سے ہمکنار کر رہے ہیں۔ کراچی سے سانگھڑ، سانگھڑ سے لے کر پشین تک، جہاں جہاں ضمنی انتکابات ہوئے، حکومت کو عبرتناک شکست ملی ہے۔