وزیراعظم عمران خان نے کہا ہے کہ موجودہ حکومت کی اولین ترجیح عام آدمی کا مفاد ہے۔

تفصیلات کے مطابق وزیرِاعظم عمران خان کی زیر صدارت حکومتی معاشی ٹیم کا اجلاس ہوا ہے۔

اجلاس میں خطاب کرتے ہوئے وزیراعظم نے ہدایت کی ہے کہ بالواسطہ ٹیکسز کا بوجھ کم کرنے پر خصوصی توجہ دی جائے کیونکہ بالواسطہ ٹیکسز کا بوجھ سب سے زیادہ غریب طبقات پر پڑتا ہے۔

وزیرِ اعظم عمران خان کی زیر صدارت حکومتی معاشی ٹیم کا اجلاس pic.twitter.com/8FnvZ5vcbj

Advertisement

— Prime Minister's Office, Pakistan (@PakPMO) February 8, 2021

وزیراعظم کا کہنا تھا کہ درآمد شدہ کھانے پینے کی مختلف اشیاء پر عائد ٹیکسز میں بھی کمی لانے کے حوالے سے بھی تجاویز پیش کی جائیں جس میں عوام بالخصوص غریب اور مڈل کلاس کو ریلیف فراہم کیا جا سکے۔

وزیراعظم نے مزید کہا ہے کہ غریب عوام کو ہر ممکنہ ریلیف فراہم کرنا حکومت کی اولین ترجیح ہے تاہم مشکل معاشی حالات کی وجہ سے غریب عوام سب سے زیادہ متاثر ہو رہی ہے۔

اجلاس میں ڈاکٹر عبدالحفیظ شیخ، اسد عمر، مخدوم خسرو بختیار، عبدالرزاق داؤد سمیت ڈاکٹر عشرت حسین، گورنر سٹیٹ بنک  ڈاکٹر رضا باقر، ڈاکٹر وقار مسعود، ندیم بابر، تابش گوہر  اور سینئر افسران شریک ہوئے۔

اجلاس میں بنیادی اشیائے ضروریہ کی قیمتوں میں کمی لانے اور عام آدمی کو ریلیف فراہمی سمیت احساس پروگرام کے تحت مستحق خاندانوں کو ٹارگیٹڈ سبسڈی کی فراہمی کے حوالے سے مختلف تجاویز پر بھی غور کیا گیا ہے۔