بول نیٹ ورک کے خلاف پیمرا کے غیر قانونی اقدامات پر بول اور عوام گزشتہ کئی ہفتوں سے سراپا احتجاج ہیں۔

تفصیلات کے مطابق بول نیوز کی جانب سے چیئرمین پیمرا سیلم بیگ کی نااہلی پر آواز اٹھائی گئی تھی جس پر چیئرمین پیمرا نے بول کے خلاف غیرقانونی اقدامات شروع کردیئے جس میں انہوں نے اپنے ماتحت افسران کو بھی شامل کیا۔

چیئرمین پمیرا سلیم بیگ کے احکامات پر پیمرا افسران کی جانب سے ملک بھر کے کیبل آپریٹرز کو بول نیوز کی نشریات بند کرنے اور چینل کو سب سے آخری نمبروں پر ڈالنے کے آڈرز دیئے جارہے ہیں۔

اس ضمن میں بول نیوز کی جانب سے چیئرمین پیمرا سمیت دیگر افسران کے خلاف سندھ ہائی کورٹ میں درخواست دائر کی گئی ہے جس میں استدعا کی گئی ہے کہ کیبل آپریٹرز کو خلاف قانون چینل کو بند کرنے کے احکامات دیئے جارہے ہیں ۔

استدعا میں مزید کہا گیا ہے کہ چیئرمین پیمرا بول کے خلاف غیر قانونی احکامات جاری کر کے عدالتی حکم نامے کی خلاف ورزی کر رہے  ہیں لہذا چیئرمین پیمرا سمیت تمام افسران کو عدالت میں طلب کر کے ان کے خلاف توہین عدالت کی کارروائی کی جائے۔

علاوہ ازیں بول کی جانب سے ایس ایچ او زمان ٹاؤن کو بھی چیئرمین پیمرا و دیگر افسران کے خلاف مقدمہ درج کرنے کی درخواست دی گئی ہے جس میں موقف اختیار کیا گیا ہے کہ چیئرمین پیمرا غیر قانونی طور پر عہدے پر فائز ہیں۔

یاد رہے کہ عدالتی حکم نامے کے مطابق چیئرمین پیمرا کو بول نیوز کے خلاف کارروائی کرنے سے منع کیا گیا ہے تاہم اس کے باوجود ان کی جانب سے 3 فروری کو بول نیوز اور انٹرٹینمنٹ کے خلاف کیبل آپریٹرز کو احکامات جاری کیے گئے۔