وزیر خارجہ شاہ محمود قریشی نے کہا ہے کہ پاک بھارت کے درمیان سیز فائر اتفاق اہم پیش رفت ہے۔

تفصیلات کے مطابق پاک بھارت سیز فائر معاہدے کے حوالے سے وزیر خارجہ مخدوم شاہ محمود قریشی نے اہم بیان جاری کیا ہے۔

وزیر خارجہ نے کہا ہے کہ پاک بھارت سیز فائر معاہدہ مستقبل کیلئے ایک اچھا آغاز ثابت ہو سکتا ہے بھارت کو خلوص نیت کیساتھ اس سیز فائر معاہدے کی پاسداری کرنا ہو گی کیونکہ جب تک ماحول سازگار نہیں ہو گا ہم مقبوضہ کشمیر کے مسئلے پر پیش رفت کیسے کر سکیں گے۔

وزیر خارجہ کا کہنا تھا کہ اگر بھارت اس معاہدے کی پاسداری کرتا ہے تو یہ آئندہ کی طرف ایک مثبت قدم ہو گا۔

شاہ محمود قریشی نے کہا ہے کہ بھارت کے 5 اگست 2019 کے یک طرفہ اقدام کے بعد ماحول میں جو بگاڑ پیدا ہوا اس کی درستگی کیلئے اسے اہم موقع سمجھتا ہوں اور پاکستان بھی ہمسایہ ممالک کے ساتھ پرامن تعلقات کا خواہاں ہے۔

انہوں نے بتایا کہ عالمی برادری کیساتھ جب جب رابطہ ہوا میں نے انہیں خطے کے امن و امان کو درپیش خطرات سے انہیں آگاہ کیا کہ بھارت سرکار کو اپنی کشمیر پالیسی پر نظر ثانی کرنا ہو گی۔

کشمیری، دہلی سرکار کی غلط پالیسیوں کے باعث ان سے دور ہو چکے ہیں اور آج کسان بھارت سرکار کے رویے سے نالاں ہیں اور سراپا احتجاج ہیں۔

وزیر خارجہ نے مزید بتایا کہ میں نے اقوام متحدہ کے سیکرٹری جنرل اور سلامتی کونسل کے صدر کو کئ خطوط ارسال کیے اور عالمی برادری کی توجہ اس جانب مبذول کروائی، ہم نے واضح کیا کہ سیز فائر خلاف ورزیوں سے ہمارے معصوم شہریوں کو نشانہ بنایا جا رہا ہے۔