وزیراعلیٰ پنجاب عثمان بزدار نے کہا ہے کہ پاکستان یورپی یونین کے ساتھ تعلقات کو مزید مضبوط بنانا چاہتا ہے۔

تفصیلات کے مطابق وزیراعلیٰ پنجاب سردار عثمان بزدار سے یورپی یونین کی سفیراندرولا کمینارا کی ملاقات ہوئی ہے۔

ملاقات کے دوارن باہمی دلچسپی کے امور،تعلقات کے فروغ اور مختلف شعبوں میں تعاون بڑھانے پر تبادلہ خیال کیا گیا ہے۔

یورپی یونین کی سفیر کی جانب سے واٹر ویسٹ مینجمنٹ کے حوالے سے تکنیکی معاونت کی پیشکش کی گئی جبکہ باہمی تعاون کو فروغ دینے کیلئے ورکنگ گروپ تشکیل دینے پر اتفاق کیا گیا ہے۔

اس موقع پر وزیراعلیٰ پنجاب نے کہا ہے کہ پاکستان اور یورپی یونین کے ممالک کے مابین انتہائی دوستانہ اور معاشی تعلقات موجود ہیں اور اس تعلق کو مزید مضبوط بنایا چاہتے ہیں۔

وزیراعلیٰ پنجاب نے کہا کہ ان تعلقات میں بہتری سے عوام کو فائدہ پہنچے گا کیونکہ  یورپی یونین پاکستان کا ایک بڑا تجارتی پارٹنر ہے۔

عثمان بزدار کا کہنا تھا کہ وزیراعظم عمران خان کی قیادت میں پاکستان اس سفر کی جانب گامزن ہے جس کا خواب قائدؒ اور اقبالؒ نے دیکھا تھا، ہر قدم پاکستان کو ترقی یافتہ اور خوشحال ملک بنانے کی جانب اٹھ رہا ہے۔

انہوں نے یورپی یونین کی سفیراندرولا کمینارا کو بتایا کہ پاکستان نے جی ایس پی پلس کے حوالے سے ٹھوس اقدامات کئے ہیں اور اب ہم چائلڈ لیبر کے خاتمے کیلئے پرعزم ہیں۔

انہوں نے بتایا کہ زراعت اور لائیو اسٹاک کے شعبہ میں ویلیو ایڈیشن کی بےپناہ گنجائش ہے تاہم یورپی یونین کی جانب سے ان سیکٹرز میں ٹیکنالوجی کی فراہمی کا خیرمقدم کریں گے۔

اس موقع پر سفیر یورپی یونین  کا کہنا تھا کہ پاکستان نے جی ایس پی پلس کے حوالے سے مثبت پیش رفت کی ہے اور اب پنجاب حکومت کے ساتھ واٹر ویسٹ مینجمنٹ کے حوالے سے تعاون کیلئے تیار ہیں۔

چیئرمین منصوبہ بندی و ترقیات اور چیف ایگزیکٹو آفیسر پنجاب سرمایہ کاری بورڈ بھی اس موقع پر موجود تھیں۔