اسٹیٹ بینک آف پاکستان کا کہنا ہے کہ  پینشنرز کو  اب سال میں دو مرتبہ بایو میٹرک تصدیق کرانا ہوگی۔

تفصیلات کے مطابق  حکومت  کی جانب سے لائف سرٹیفکیٹ کو بائیو میٹرک تصدیق سے تبدیل کرنے کے فیصلے کے بعد اسٹیٹ بینک آف پاکستان (ایس بی پی) نے بینکوں کے لیے سرکلر جاری کردیا جس اطلاق فوری  طور پر ہوگا۔

 پینشنرز کو ہر سال مارچ اور ستمبر میں اپنا بینک پینشن اکاؤنٹ والی کسی بھی برانچ سے بائیو میٹرک تصدیق کرانے کی ضرورت ہوگی۔

نئے نظام  سے گھوسٹ پینشنرز کو روکنے اور بجٹ پر بڑھتے ہوئے بوجھ کو کم کرنے  میں مدد ملے گی۔

یاد رہے کہ گذشتہ روز   وفاقی حکومت نے پینشنرز کی سال میں دو مرتبہ بایو میٹرک تصدیق کرانے کا فیصلہ کیا تھا۔

وفاقی حکومت کی جانب سے فیصلے میں کہا گیا تھا کہ سال  میں دو مرتبہ مارچ اور ستمبر میں پینشنرز بائیو میٹرک تصدیق فراہم کرنے کے پابند ہوں گے۔

تاہم  اگر کوئی پینشنر بیمار یا چلنے پھرنے کے قابل نہ ہو تو اسے اپنے دستخط سے سرٹیفکیٹ فراہم کرنا ہوگا اور سرٹیفکیٹ کے ساتھ حاضری سے استثنیٰ کی درخواست بھی فراہم کرنا ہوگی۔

پینشن دینے والا افسر بائیو میٹرک تصدیق یا پینشنر کے زندہ ہونے کے ثبوت پر پینشن جاری کرنے کا مجاز ہوگا۔

چھ ماہ تک ڈرائنگ پینشن سرٹیفکیٹ یا بائیو میٹرک تصدیق فراہم نہ کرنے والے پینشنرز کا اکاؤنٹ غیر فعال کردیا جائے گا۔