سربراہ پاک فضائیہ ایئر چیف مارشل مجاہد انور خان نے کہا ہے کہ دور حاضر کی حربی کامیابی، مؤثر جنگی بصارت اور فیوژن پر منحصر ہے۔

ترجمان پاک فضائیہ کے مطابق سربراہ پاک فضائیہ نے 54 ویں کمبیٹ کمانڈرز کورس کی گریجویشن تقریب میں بطور مہمان خصوصی شرکت کی۔

تقریب سے خطاب کرتے ہوئے ایئر چیف نے کہا ہے کہ آپریشن سوئفٹ ریٹارٹ سے اخذ کردہ نتائج اس بات کے غماز ہیں کہ ہماری حربی تربیت حقیقی منظر نامے پر استوار ہے۔

ایئر چیف مارشل مجاہد انور خان نے کہا ہے کہ آپ کو دشمن کی حربی قوت کا مکمل ادراک اور اس کی چالوں سے مکمل آگاہی ہونی چاہئیے۔

انہوں نے اس امر پر اطمینان کا اظہار کیا کہ ایئر پاؤر سینٹر آف ایکسیلنس بالعموم اور کمبیٹ کمانڈرز اسکول بالخصوص، مستقبل کی عسکری قیادت کی تربیت کے لیے بہترین اقدامات اٹھا رہے ہیں۔

سربراہ پاک فضائیہ نے کورس کے گریجویٹ ہونے والے آفیسرز  کو ٹرافی اور اسناد سے بھی نوازا ہے۔

کمبیٹ پائلٹس میں بہترین کارکردگی کا مظاہرہ کرنے پر چیف آف دی ائیئر اسٹاف ٹرافی ونگ کمانڈر وحید ظفر نے حاصل کی جبکہ کمبیٹ کنٹرولرز کے مابین بہترین کارکردگی کا مظاہرہ کرنے پر ائیئر آفیسر کمانڈنگ ایئر ڈیفنس کمانڈ ٹرافی اسکواڈرن لیڈر علی احمد نے حاصل کی۔

پرنسپل اسٹاف آفیسرز اور فیلڈ کمانڈرز کی ایک بڑی تعداد نے بھی تقریب میں شرکت کی۔